Nkosilathi Sibanda
IQEMBU elisanda kuphakanyiselwa kuPremier Soccer League, iBlanket Mine FC elivela edolobheni leGwanda selithembise ukuba lizaqhuba imidlalo yalo enkundleni yeGwanda ngomnyaka ozayo.
Iqembu leli kalicinanga ngokuthola indawo kuPSL kuphela kodwa lidlale njalo ngendlela encomekayo, liqeda isizini yeCentral Region Soccer League lingakaze linqotshwe.
IBlanket Mine yanqoba imidlalo engu-23, yatshiya engu-11 iphele ngokulingana emidlalweni engu-34, yaqoqa imiklomelo engu-80. Itshiye iKwekwe United elandelayo kulogu ngemiklomelo emihlanu.
Izimbamgodi zegolide lezi zivale isizini ngokudlala ngokulingana 1-1 leGood Morning emdlalweni obuseSabiwa Stadium, lapho uMatthew Hlabathi athole khona ibhola ngomzuzu wesi-58, eliqinisekise ukuthi iqembu lakhe lithathe isicoco seligi.
Ukuphela komdlalo kudale intokozo enkulu kubadlali, abaqeqetshi labalandeli abahlangane bagcwalisa inkundla bethabela iqembu elenze imbali edolobheni leGwanda, esabelweni seMatabeleland South.
Kusenjalo, umaneja weBlanket Mine u-Elton Gwatidzo utshele abalandeli ukuthi ngeke bahlanekele inkundla yabo.
“Kasiyindawo, asisuki enkundleni yethu. Kungathatha isikhathi kodwa sikhona lapha.”
Omunye wabalandeli asebeleminyaka belandela iqembu leli uthe sekuyisikhathi sokuthi abantu beGwanda bathole ithuba lokubona ibhola eliphezulu.
“Besesilinde iminyaka eminengi ukuthola impumelelo enje. IGwanda ilabadlali abaleziphiwo njalo ilabantu abathanda ibhola. Khathesi sesileqembu kuPSL. Lesi yisikhathi sethu,” kutsho umlandeli lo uNkosana Nleya.
Omunye umlandeli, uProgress Hlongwane ucele ukuthi iziphathamandla zilungise inkundla ukuze iqembu lingacini selidlalela imidlalo yalo koBulawayo.
Uthe impumelelo le izavula amathuba okuthi abasakhulayo eGwanda bakhule belamaphupho okudlala ibhola eliphezulu.
“Lokhu akuphathelananga lebhola kuphela, kodwa kumayelana lokuthi iGwanda ibonakale njalo iqakathekiswe. Abantwabethu sebengaphupha ngokudlala kuPSL bengasuki ekhaya.”
IBlanket Mine khathesi ilomsebenzi wokwakha iqembu eliqinileyo elizakwenelisa ukumelana lomncintiswano weligi ephezulu lokuqinisekisa ukuthi inkundla yayo iyahlangabezana lezimiso zePSL.
Lanxa kunjalo, abantu beGwanda basenelisa ukuthakazelela impumelelo enkulu yeqembu labo eliqede isizini lingakaze linqotshwe, labhala imbali engasoze ilibaleke edolobheni leli.
