IMaphisa ivuna izithelo zokusingatha usuku lukaZibuse

Raymond Jaravaza

Okweminyaka, iMaphisa ibisaziwa njengendawo ethuleyo futhi esemaphandleni esigaba seMatobo — indawo lapho impilo ehamba kancane njalo insuku zidlula kungela okuziphazamisayo.

Kodwa lamuhla, lokho kuthula sekuguqulwe kwaba yikubhonga kwemitshina esindayo kanye lomsebenzi oqhubekayo wamaqembu okwakha njengoba imisebenzi emikhulu iqhutshwa masinya kulungiselelwa ukuthakazelelwa kwelanga likaZibuse kulindawo.

Imitshina emikhulu yokwakha isigcwele kulindawo, isusa umhlabathi, yakha imigwaqo emitsha futhi iqhuba intuthuko ebilindelwe isikhathi eside. Imigwaqo, izikolo, izindawo zezempilo, inkundla yezemidlalo, igceke lezindizamtshina kanye lesikhungo samasiko — konke okwakhiwa ngesikhathi sinye — sekuyikho okukhulunywa ngakho kakhulu esigabeni, njengoba izakhamizi zisithi kazikhumbuli zibona isikhathi lapho okweza intuthuko engaka esigabeni.

U-Eveline Moyo, ophethe isitolo esincane eMaphisa Shopping Centre, uthe inguquko enje kakaze ayibone.

“Angikaze ngibone imitshina eminengi kangaka esebenza endaweni eyodwa empilweni yami yonke. Kuyacaca ukuthi umcimbi omkhulu kakhulu uza eMaphisa ngoba imitshina ikhona yonke indawo futhi isebenza ubusuku lemini.

“Umnawami usebenza enkundleni yezemidlalo futhi uthi basebenza ubusuku lemini ukuze konke kuqedwe ngaphambi kwemigubho yosuku lukaZibuse ngenyanga ezayo,” utsho njalo.
Esinye sezigcawu ezihlaba umxhwele kakhulu yikwakhiwa kwenkundla yezemidlalo yeMaphisa, lapho umsebenzi osukhuliseke ngaphansi kwezibane ezifakiweyo ezivumela ukusebenza amahola angu-24.

UMphathintambo wezokuHlaliswa kwabaNtu kanye leMisebenzi yoMphakathi uDaniel Garwe uthe izibane ziqinisekisa ukuthi umsebenzi usuzaphela.

“Inkundla le yakhiwe kwafakwa i-drainage system ezakwenza sibe lesiqiniseko sokuthi ngeke kube lamanzi kunkundla nxa izulu lithe lana.

“Izulu kalisoze libe yinkinga eMaphisa Stadium,” utsho njalo.
“Kulezisebenzi ezingaphezu kwe-1  000 — inengi lazo kuyizakhamizi zendawo — ezibambe iqhaza emizanyweni yokwakha kulindawo.

Uhlelo lwentuthuko lolu luhlanganisa izikolo, isizinda samasiko, izindawo zempilakahle, isikhungo sokuqeqetsha ngamakhono kanye lemisebenzi emikhulu yemigwaqo, iphurojekithi ngayinye iletha usizo olukhulu emphakathini.

EMahetshe Primary School, lapho okuzaqhutshwa khona umdlalo wabantwana, kwakhiwa ama-block amane amakilasi asefinyelela ezingeni lokufulela, izindawo zokugezela zesimanje phose seziphelele ngamaphesenti angange-80, futhi izindlu zababalisi lakho zakhiwe.

UMphathintambo uGarwe uthe intuthuko le isikhuphule izinga lendawo yemfundo kulindawo.
“Sekuyiminyaka abafundi ezikolo zombili iMahetshe Primary kanye leMahetshe Secondary bethembele ezindlini zangasese zeBlair, kodwa isinqumo sikaHulumende sithi abantwana lapha manje bazazuza izindlu zangasese zesimanje,” utsho njalo.

EMahetshe Secondary School, ukwanda kuyaqhubeka ngama-block amatsha ayisithupha ekilasini, ilabhoretheri yesayensi, izindawo ezintsha zokugezela kanye lezindlu zababalisi ziyakhiwa.

Isikhungo samasiko sesiseduze lokuphela. UMqondisi weMatabeleland South kugatsha lweZemidlalo, ezokungcebeleka, ubuciko kanye lamasiko, uPromise Dube, uthe manje sekucitshe kwaphela nge-90 phesenti futhi kuzosebenza njengesikhungo sokulondolozwa kwamasiko.

“Umqondo wokudala isikhungo lapho izivakatshi, abantwana besikolo kanye labavakatshi abangafunda ngamasiko abantu besiNdebeleni,” utsho njalo..

Izikhulu zithi imisebenzi ayisekeli kuphela umcimbi kaZibuse ozayo kodwa futhi ibhekana lokubambezeleka kwentuthuko okwathatha iminyaka. Umqondisi wesigaba kugatsha lwezokuHlaliswa kwabaNtu kanye leMisebenzi yoMphakathi, uSijabuliso Ncube, uthe uhlelo lolu solulethe ingqubekela phambili ebisemuva kakhulu kusigaba leso okwesikhathi eside.

“Leli lithuba ebesililindele okweminyaka eminengi akulandawo okufanele isalele emuva,” utsho njalo.