Innocent Kurira
UKAPUTENI weHighlanders uDarlington Mukuli usekhuthaze abadlali beqembu lakhe ukuthi balwele “isikipa” nxa bedlala leCAPS United, kumdlalo we-semi-final yeChibuku Super Cup ngeSonto.
Umdlalo lo uqakatheke kakhulu kuBosso njengoba iqembu ligubha iminyaka elikhulu lasungulwa.
Ukuthatha isicoco kungaba yisipho esihle kubalandeli balo, kuphinde kwenze umnyaka lo ube ngozahlala ukhunjulwa.
Njengoba iHighlanders ingaselathemba elikhulu lokwenza kuhle kuligi yeCastle Lager Premier
Soccer League, iChibuku Super Cup yilo ithuba eliseleyo lokuthi iqembu lithole isicoco kumnyaka walo wekhulu.
UMukuli uthe abadlali kumele baqine enkundleni, bekhumbula ukuthi ukugqoka isikipa seHighlanders kulomlandu wokulwela iqembu labalandeli balo.
Uthe imidlalo emikhulu enjengalo ibanika ithuba lokutshengisa ukuthi bayenelisa, ikakhulu njengoba ukunqoba kungabasondeza ekuphakamiseni isicoco ngomnyaka oqakatheke kakhulu kumbali yeqembu.
“Sidlala leCAPS United kumdlalo we-semi-final yeChibuku Super Cup ngeSonto, njalo imidlalo enjengale ikhuthaza umdlali munye ngamunye,” kutsho uMukuli.
“Njengoba singaselalutho esilulwelayo kuligi, kumele sizinikele ngokupheleleyo. Sigubha iminyaka engu-100 lonyaka, ngakho kungaba yintokozo enkulu ukuba lesicoco esingasitshengisa.
“Sizafaka konke esilakho emdlalweni, silwele isikipa sethu. Ekucineni sithemba ukuthi izinto zizahamba kuhle.”
Amazwi kaMukuli atshengisa ukuqakatheka komdlalo lo kubalandeli beHighlanders, asebelethemba lokubona iqembu labo lisenza kuhle enkundleni, lihlonipha imbali yalo lokuba ngelinye lamaqembu alabalandeli abanengi eZimbabwe.
Ukugubha iminyaka engu-100 sekubeke iBosso emehlweni abantu, njalo ukunqoba iChibuku Super Cup kungaba yindlela yokuphelelisa imikhosi le.
UMukuli labanye abadlali bakhe sekumele baguqule isifiso lesi sibe yimpumela enhle, benqobe iCAPS United. Amaqembu la ayazana, ngakho iHighlanders izadinga ukuzimisela, ukuzithiba lokusebenzisa kuhle amathuba ezawathola.
IBosso akumelanga ithembe kuphela umdladla wokugubha iminyaka engu-100. Ukukhuthaza kukaMukuli kutshengisa ukuthi iqembu lidinga ukumanyana, lisebenze ndawonye njalo limele isikipa salo ngokuziqhenya.
