Vusumuzi Dube
INKAMPANI yeZimpapers isisungule uhlelo lweJunior Media Club, lwabafundi abathanda ezokusakaza lomsebenzi wokuba yintatheli, ngenhloso yokulolonga iziphiwo zabantwana lokubakhuthaza.
Uhlelo lolu lusungulwe esikolo seManama High, eGwanda esabelweni seMatabeleland South ngoLwesine.
Abafundi abavela ezikolo ezingu-22 eGwanda bazathola ithuba lokuba yingxenye yeJunior Media Club, esungulwe ngaphansi kwendikimba ethi “Catch Them Young – Empowering the Next Generation”.
Kukhangelelwe njalo ukuthi abafundi bazaphathiswa ngokwabelwa ulwazi ngemisebenzi etshiyeneyo abangayikhetha empilweni zabo nanko kuzaqhutshwa le-Careers Day.
Abantwana bazafundiswa ngemisebenzi eyehlukeneyo yokuba yintatheli egoqela ukubhalwa kwamaphephandaba, ezokusakaza emsakazweni, lakumabonakude, ukuthatha imifanekiso, ukuthatha amavidiyo, ukwenza ama-podcast lokunye okwenzakala kulezinsuku ebulenjini.
UMsekeli kaMphathintambo wogatsha olubona ngezokukhitshwa kwembiko uDokotela Omphile Marupi, ophinde abe ngummeli weGwanda South ePhalamende, nguye isikhulumi esiqakathekileyo.
Ukusungulwa kweJunior Media Club kuveza imizamo yokukhulisa isizukulwane esitsha esizakuba lamathalenta lolwazi lokubika indaba, ukuthatha imifanekiso, ukusabalalisa imbiko eqondileyo ngendlela ezihambelana lesikhathi samanje.
