KALANGA: Lekedza Zwinolaladzisa

Wiseman Sibanda, [email protected]

Hingisiwa zwakayipa kwezwinolaladzisa kwamela midzi mubupenyu gwebanhu hango yose. Zwinolaladzisa zwatjileta buyendasi gusiguhoma. Zosiya mizi yakapalala, bana besina bazwadzi, bazwadzi besina bana nemawoloto akapelela mumhepo. Buhongola gwezwinolaladzisa aguna nghanhu, agutohalawula banhu, agutoziba nfumi kene n’hayi, whola kene ntjetjana.  Mundebo yanasi tolinga zwinjinji zwinolaladzisa, mboli yazo, tipamhe tilinge nekuti ngwa yepedza zwinolaladzisa ingagwisiwa nawapi mano.

Banozwileba bekati zwinolaladzisa zwinjisa kuti atingazwibale tikazwipedza. Zwimwe zwazo zwinohanganya banhu miholo imbanje, busukwa, bhenzini, cocaine, crystal meth, heroin, glue nezwimwe zwingakusiya wakakaabala kuti kati ibo banokuhingisa bake babudziwa nani kuti kolaladzisa. Zwimwe zwayezwi zwinolaladzisa zodila banhu ngwele, kumwe kosiya banokuhingisa batjihangana miholo benda benunga maphepha muzila. Tjakayipa whuti ukagala wahingisa zwinolaladzisa kolema kuti uzwiletje. Ndizo kudze nhu asikubadziwe nezwinolaladzisa ngaasigale aba nebukamu nazo.

Mbanje dzabe nemakole manjinji kwazo dzihingisiwa setjinhu tjinolaladzisa. Bamwe banodzidana beti iganja kene nzolo. Banodzihingisa kukayi banodzipetela nephepha bekodzipfuta sefodlo. Bamwe kukayi banohanganya nezodliwa, bamwe bekadzin’wa setiyi. Ngono hingisa mbanje nezila yakayipa kukayi koleta ngwele dzemapapu nedzemoyo. Mapapu anobola, nemoyo ukasala ulobela pehhugwi kungata kuti limwe hhuba unyale udze unyalale zwawo. Banodzipfuta bebva bedirayiva dzimota banobe besingatjabone zila zubanana. Ikoku kota mboli dzezila dzikasapela, kusiya banhu bakakubala bamwe batjiyizela tjatjose. Tosowha kuyi bamwe banodzipfuta bekabona zwipuku lilimpani. Kubva kuti adzizonaka, ngatidziletjeni!

Mfananidzo wembanje. Watogwa muludandi

Kumwe kunosiya banhu belizwipengana i-cocaine. Banoyiziba bekati cocaine ntolo yake ihingisiwa senti unolapa, ikabva ihingisiwa muna zwinon’wiwa. Nenda kwelubaka bayapo bakaziba kuti inolaladzisa. Kukayi ayakungina inobhuda zwakalema semadimoni aLigiyoni. Banoyihingisa nezila isakatambunuka koyi banoyikweba nezwimilo bamwe beyibhayila mumbili nenjekiseni. Banoyidla kukayi banogala benabuhongola senyutji dzegona, begala bakagwa nebanhu. Ngono akuna unohaka-ba nebukwinya nenhu wakajalo ngobe engakuta zwidlo kene lini zwako. Hingisiwa kwe-cocaine koleta ngwele dzemoyo, nhu epeleledza alobgwa ne-stroke. Bamwe ndebanopelela bapfula gabhha.

Bamwe koyi banolaladzisiwa nebhenzini, iyo koyi inohotjewa nezwimilo. Bhenzini unti unohingisiwa muthama zwinhu zwinonga bo-glue nevu ledzulula (penda). Banoyihotja kukayi inobasa dzungu, ikabalobesa nemiholo bekabe nehhangan’wa dzisingapele. Bamwe koyi banobe begala bedona ndenda, bamwe benda bebukula sembgwa. Mumbili inokubadza mongo wemafupa, ikahha ikata malopa ekabe mahomanana. Kubupelo banotola glue sezodliwa banokubala bulubi nedzinso, bepelela baloba gundayi. Ngatiyiletjeni bhenzini, ayizotigwa mbili, nembili awuzotigwa bhenzini.

Heroin imwe-bo inohingisiwa sezwinhu zwinolaladzisa. Kukayi yakatangisa ihingisiwa senti unolapa fuba nelalisa hungu. Nenda kwelubaka bezwebutjilo bakabona kuti inonamatila tjose mubanhu banoyihingisa. Koga-ke banoda laladza bakandila mbeli beyihingisa nezila isakatambunuka. Kukayi banoyibhayila mumbili nenjekiseni, bamwe banoyihotja nezwimilo, bamwe beyihanganya nefodlo kene mbanje kuti bamwe beyibgwila nenlomo setjukela.

Banoyihingisa-ke heroin bakalingisana nemboli yekuti hayitoletjeka, bamwe inobata bekafema zwakalema batjihhalilika zila inonda meya. Bamwe banopelela babe nengwele dzemoyo. Kose koku kolakidza kuti banohwelela beyihingisa banopelela bepedzela-po mari. Ape belitate kene mme benzi bana babo banofa nehhala mari yetenga zodliwa yatjinda kuna zwinolaladzisa. Ape yapela mali nhu unopelela enda ekwibila banhu kana koyi nyota ye-heroin inogala ilipo tjoselele.

Ngono tjinopedza mate munlomo tjikasiya banhu bakakaabala wuhingisiwa kwezwitjubo setjinhu tjinolaladzisa. Banokuthama koku koyi banonda benunga zwitjubo zwakalahiwa.

Zwitjubo zwezwi koyi banozwihapayidza bebva-po ben’wa vula yakhona. Kukayi hawayin’wa hambgwa yeyi nolaladza kwemahhuba tjose.

Banota koku banotjenamisa kuti kati banhu ludzini basingaheme hambgwa yakajali. Banon’wa koku kukayi bamumboli yekubala tjilopa nedzinso nebhata ngwele dzakasiyana siyana.