Sidumisile Mabena
Sikumbuzo Moyo
KUBUYE kwathunukala amanxeba kutholakala ikhanda kunye lesitho somuntu ngeSonto lapho okwenzakala khona ingozi yomgwaqo phakathi kweChipangali kunye leSigodini okwenza kucatshangelwe ukuthi kungenzeka ukuba kwafa abantu abedlula i-12 ababikwayo.
Imuli elokhu idinga ubabakazi wayo ongabonakaliyo, kubikwa ihlanganyele lequla ebelilokhu lihlola indawo le, kuze kubonakale limbedumehlwana le, ngeSonto, ngokutsho kukaMqondisi jikelele weZimbabwe Civil Protection Unit, uMnumzana Nathan Nkomo.
“Iqula elalilapho okwenzakala khona ingozi ngeSonto lithole ikhanda kunye lesinye isitho somzimba. Lokhu kwenzakale ngemva kokuba enye imuli elokhu idinga isihlobo sayo icele ukuba yingxenye yequla elidingayo, lokhu kungabe kusitsho ukuthi inani labantu abedlula emhlabeni kungenzeka ukuthi libe liphezulu kwe-12 eyabikwayo,” kutsho uMnu Nkomo.
Uthe iziphathamandla sezizathatha amanyathelo okuthola ukuthi ngezabobani izitho ezitholakeleyo kusetshenziswa i-DNA testing.
“Sikhulumisana labeNational University of Science and Technology (NUST), esizwisisa ukuthi balempahla eqondileyo yokudingisisa ngalindleka njalo indleko zakhona zizabhadalwa zonke nguHulumende kusetshenziswa iwofisi ye-CPU,” kutsho yena.
UMnu Nkomo uthe inhlolisiso lezi zizakwenziwa njalo lakwezinye izidumbu ezintathu ezitshe kungozi le, okubangela ukuthi kubenzima ukuthi kwaziwe ukuthi ngobani.
Ngesikhathi intatheli zivakatshela kule indawo, amanye amalunga emuli ebelokhu ebhoda edinga angakuthola okungokwesihlobo sabo.
Elinye ilunga lemuli elilokhu lidinga umnewabo lithe bazakwamukela isimo lesi bangathola isidumbu sesihlobo sabo.
“Umnewethu wayelomzimba omkhulu, sizwa kuthiwa wayegqoke ibhulugwe elimnyama. Sesilibonile ibhulugwe elilombala lo, kodwa ukuqinisekisa ukuthi lalingelakhe kunzima,” kutsho ilunga lemuli.
Kusenjalo, umgwaqo usuvuliwe ngemva kokuba abakhokheli bebevale umgwaqo lo ukuze kube lenhlolisisa epheleleyo.
Online Reporter