Online Reporter
Ethel Ncube
AMAPHOLISA akoBulawayo asexwayise uzulu ukuthi nxa esiyavakatsha ikakhulu etshiya endlini kungelamuntu bangaze bathanda ukufaka konke abakwenzayo kunkundla zokuxhumana ngoba amasela athola khona ulwazi abaludingayo abalusebenzisa nxa besiyatshontsha.
Isikhulumi samapholisa koBulawayo uInspector Nomalanga Msebele uthe ngekhefu amasela manengi futhi kawathandabuzi ukungena ezindlini agqekeze.
Uthe ngesikhathi lesi amacala okugqekeza ayakhuphuka kungakho abantu kumele baqaphele.
Ekhuluma lentatheli ubike ukuba amasela athola ulwazi olunengi kunkundla zokuxhumana.
“Abantu nxa besiyavakatsha ngekhefu bayafaka kuma- status abo eWhatsApp kumbe kuboFacebook bakhohlwe ukuba kulamasela akhangelayo izinto ezifana lalezi kunkundla zokuxhumana.
“Lokhu yikho okwenza bakwazi lapho okumele baqonde khona bayetshontsha ngoba wena nguwe oyabe uchaze imfihlo zakho ku-status,” kulandisa uInsp Msebele.
Uxwayise izakhamizi ukuba konke abakwenzayo ngesikhathi sekhefu kumele kube yimfihlo yabo njengemuli ukuze bazivikele kumasela.
“Okunye esikuxwayisa izakhamizi nxa uzavakatsha utshiya indlu ingelamuntu hamba uyebikela inkamba yamapholisa eseduzane lawe ukuba uzabe ungekho okwesikhathi esithile.
“Nxa umakhelwane umethemba laye mazise ukuthi awukho ukuze asale ekukhangelela indawo yakho ngoba kunengi okwenzakalayo ngesikhathi sekhefu kungakho asihlaleni siqaphele ukuze singalahlekelwa zimpahla zethu ngenxa yamasela,” kutsho uInsp Msebele.
