Online Reporter
Brandon Moyo
OWAKE wadlalela iqembu lamaChevrons, uChristopher Mpofu, usengumqeqetshi welizwe le-Armenia.
UMpofu, oleminyaka yokuzalwa engu-39, uqhatshelwe ukuthi alolonge abadlali ukujika ibhola, nanko laye waziwa kabanzi ngokuba yingcitshi yokubamba ibhola kuyo yonke imidlalo yemidlalo yekhilikithi.
Inhlanganiso ye-Armenia Cricket Association ibeke isimemezelo sokuqhatshwa kukaMpofu ngoMvulo.
“Silokuthaba njenge-Armenia Cricket Association ukubika ukuthi uChristopher Mpofu uzakuba ngumqeqetshi wethu, ozalolonga lokufundisa abadlali ukujika ibhola,” kutsho inhlanganiso le.
“UMpofu ubengumdlali oyingcitshi eZimbabwe, njalo wadlala kakuhle kumidlalo yaphezulu. Sikhangelele ukuthi anikeze ulwazi alalo kubadlali bethu, iqembu likhule ngaphansi kwakhe. Siyajabula ngokuvuma kwakhe lumsebenzi.”
UMpofu kukhangelelwe ukuthi abambe intambo lakumqhudelwano we-Armenia Cricket League (ACL) T20 ngoMbimbitho ngomnyaka ozayo.
Ekhuluma lentatheli, uMpofu uthe: “Ngizabe ngikhona kumidlalo ye-Armenia T20. Lithuba elihle kubadlali ngoba bazathola ukutshengisa umhlaba ukuthi baqine okunganani lokuthi balesiphiwo emdlalweni.”
Esadlalela amaChevrons, uMpofu wabizwa eqenjini kumidlalo engu-110 njalo wenelisa ukutshaya ama-wicket angu-150. Wadlala kuma-Test angu-15, wathola ama-wicket angu-29 kuwo.
Kumidlalo yama-One Day International, uMpofu wadlala amahlandla angu-84, wathola ama-wicket angu-93. Kumhlobo womdlalo we-T20Is, watshaya ama-wicket angu-33.
