Ethel Ncube
KULENDODA eleminyaka engu-46 yokuzalwa yeShurugwi ebhaxabulwe yafa kulandela ukutholakala ilele lomfazi womnikazi kuviki ephelileyo.
Indoda le, uAnyway Zhuwawo, odabuka eMapfumo ngaphansi kwenduna uNegomo koMurehwa kubikwa yahlaselwa ngemva kokuba ikhandwe ilele lesithandwa sayo, uKuitakwashe Musaigwa ngesikhathi umkakhe engekho esiqintini seDendere ngaphansi kwenduna uBanga mhlaka 11 Mfumfu ngehola lika-10 ebusuku.
Kubikwa ukuthi umkaMusaigwa, uMoreblessing Dendere owayevakatshele eMutare waphenduka emzini wakhe engazisanga umkakhe kanti uzazithela phezulu kwenkalakatha yendaba.
UDendere kubikwa wathi engena endlini lwamtshaya lwameqa uvalo efica umkakhe elele lenye indoda embhedeni wabo.
Kubikwa uDendere wadobha isikhali esingacijanga wabhula ngaso uZhuwawo umzimba wonke.
Ngenxa yokutshaywa lokhu, uZhuwawo waba lamanxeba ekhanda wabuye wephuka enqagaleni wabaleka ebhunyumunyu waya emzini wakhe.
Ngosuku olulandelayo, wathathwa wasiwa ekilinika ukuyakwelatshwa, ngemva kwalokho wadluliselwa esibhedlela seShurugwi District Hospital lapho abhubhele khona mhlaka 15 Mfumfu esibhedlela.
Ukubhubha kwakhe kwabikwa emapholiseni
Isikhulumi samapholisa eMidlands uInspector Emmanuel Mahoko ubike ukuba umetheswacala uyadingwa.
“Amapolisa asaqhubeka ngophenyo, njalo sifisa ukukhuluma loDendere ukuze sizwe ukuthi uthini ngensolo lezi asezetheswa zokubulala.
“Sicela uzulu ololwazi olungancedisa ukuthi kutholakale uMoreblessing Dendere,” kubika uInsp Mahoko
