Online Reporter
Ethel Ncube
UMHLABELELI odume ngokucula umculo kamaskandi njalo odabuka eTsholotsho uZinjaziyamluma uzakwethula idlalade lakhe okwakuqala koNtuthu ngoMpandula.
UZinjaziyamluma uzakwethulela idlalade lakhe koBulawayo, eArt Gallery kuyonale inyanga elabanye abaculi abathi uGodolude, Indosakusa, Ungayithi Vu, Utsheketsha ogezayo kuthi isethekeli kuzabe kunguBremah.
Intatheli ixhumane loZinja obike ukuba amalungiselelo wonke okwethula idlalade ahamba kahle.
“Siphezu kokulungiselela umsebenzi wokwethula idlalade elitsha koBulawayo amalungiselelo wonke asahamba kahle.
Ngizabe ngisethula idlalade lami lesi-13 elizabe lilengoma ezilitshumi phakathi koNtuthu. Phakathi kwengoma engizazethula kulengoma egqugquzela abantu ukuba asambeni eMhlahlandlela njengoba nje ngoMpandula kuzayiwa eMhlahlandlela kuphinde kube lezinye ingoma ezitshiyeneyo,” kubika uZinja.
Uqhubekele phambili echaza ukuba esikhathini esikiso umculo suthengiswa ebulenjini kuzamele laye ahambelane lesikhathi.
“Umculo usuthengiswa ebulenjini akusafani lakudala ukuba besithengisa ama-disc khathesi suthengiswa ebulenjini lasenkundleni zokuxhumana.
Lami njengomculi ngemva kokukhupha idlalade leli amanye azalandela ngizabe sengisenza i-EP kunye lama single track ukuze ngenelise ukuba umculo wami ngiwuthengise ebulenjini. “Bantu bakoBulawayo ngiza ngizehlisa phambi kwenu ngicela lize emcimbini wami lizozizwela ubunandi engiliphekele bona,” kutsho uZinja.
Peter Tanyanyiwa