Online Reporter
Ethel Ncube
INKAMPANI yeCapital Foods koBulawayo iqeqetshise abalimi abafuya inkukhu zamaqanda lezenyama ngalelibhizimusi ngeviki ephelileyo.
Inkampani le ibifundisa indlela zokufuya inkukhu ikakhulu khathesi kubhekwane lesikhathi somqando mahala.
UDokotela Philipa Chengeta ngomunye ofundise abalimi ngenkukhu zenyama ama-broiler.
“Nxa ufuya inkukhu kumele uzinanakele, nxa zigula kumele ubekwazi ukunanzelela izitshengiselo zakhona ukuba yiziphi ukwenzela nxa usiyathenga umuthi ukuthi ufike kubodokotela ubatshele izitshengiselo ozibonayo bakuthengisele umuthi oqondileyo.
“Okunye inkukhu kumele zihlale endaweni ehlanzekileyo njalo lapho ezidlela khona lalapho lezinathela khona kumele lakho kuhlale kugeziswa kodwa akumelanga kusetshenziswe isepa yansuku zonke ukugezisa izitsha lezi.
Kulamasepa lemithi yakhona esetshenziswayo.
“Lingaya ezitolo ezithengisa imithi yezifuyo lilakho ukuwathola amasepa aqondileyo,” kubika uDkt Chengeta.
Ubuye waqhubekela phambili wakhuthaza abalimi ukuba bahambe bayesebenzisa ulwazi abalutholileyo.
“Balimi njengoba selithole izithupha lolwazi lihambe liyesebenzisa elikufundileyo ukuze lenelise ukwehlisa inani lenkukhu zenu ezifayo ikakhulu ngesikhathi somqando,” kuphetha uDkt Chengeta.
