Online Reporter
Nkosilathi Sibanda
ULWAZI lokufuya lokulima lubalulekile lasebantwini abahlala emadolobheni ukuze benelise ukulima ngokuziphilisa, bathole ukudla okuzagcina impilakahle yemuli zabo.
Lo ngumbono wenhlanganiso yeBrian Samuriwo Foundation, ephakathi kokwethula izifundo zokufuya inkukhu lokulima imbhida kuzakhamizi ezihlala kusigaba seMakhandeni-Luveve.
Izifundo lezi, zizaqhutshwa kusukela mhlaka 18 kusiyafika umhlaka 22 Ncwabakazi koSamuriwo, eLuveve. Ngokutsho kweBrian Samuriwo Foundation, wonke umuntu ukhululekile ukubhalisa mahala, kuqakathekiswa kakhulu abesifazane lamantombazana.
“Izifundo lezi ziyinsika ekuphakamiseni umphakathi ngezokulima. Sinxusa wonke umuntu, labasakhulayo bavunyelwe. Bazafundela ukufuya ama-road runner, ama-layer lama-broiler. Kuzaphinda kube lezifundo zokulima,” kubika abeBrian Samuriwo Foundation.
Ukulima lokufuya emadolobheni sekukhwabithwa ngabanengi ngoba sebekubona ukuthi kulenzuzo. Ingcitshi kwezokulima zibika ukuba ukulima emadolobheni kuyengeza ukudla emakhaya, kwehlise indleko ezinengi.
Babika njalo ukuthi kuyasiza ekulondolozeni imvelo lokudala ukubambana emphakathini.
Uhlelo lokufundisana ngokulima lukhangelelwe ukuthi luphathise abasakhulayo ngesikhathi ilizwe lilwisana lokusetshenziswa kwezidakamizwa.
Emalokitshini amanengi koBulawayo sekuvulwe izivande lapho okulinywa khona imbhida etshiyeneyo, kusetshenziswa izibholane. Inhlelo lezi sezisekelwe nguHulumende lebandla elibusayo iZanu-PF.
