Online Reporter
YiMtatheli kaMthunywa
UMBUKISO wamabhizimuzi lokuthengiselana oweZimbabwe International Trade Fair (ZITF) walonyaka usuqalisile koBulawayo.
Umpbukiso lo ufikise iminyaka engu-65 njalo uqhutshwa ngaphansi kwendikimba ethi: “Industrialisation: Crafting an Integrated Economic Landscape”.
Inkampani ye-ZITF ibike ukuba lonyaka kugcwele kundawo zokubukisa, nanko iyengeze lendawo yokubukisa ngokwanda kwamankampani akhona kumahlandla amabhizimusi agoqela ukulungiswa kwempahla, ukwemba, amandla kagetsi, ukulima, imitshina yakulezinsuku lokuthengiselana okuthile.
Ngempelaviki, ngesikhathi kuthakazelelwa ikhefu lePhasika, izisebenzi zamankampani azabukisa bezididizela, zihlanganisa ukuthi izitanda ziphele masinyane kungakafiki izivakatshi.
Ngokwesiko lombukiso lo, uMongameli uEmmerson Mnangagwa uzabhoda ebuka indawo ezithile, exoxisana labammeli bamankampani, ezibonela mathupha imisebenzi ekhona.
Lonyaka iZITF izavulwa nguMongameli weMozambique uDaniel Chapo ngoLwesihlanu. Amazwe womabili akhulisa ubudlelwano kumabhizimusi.
Umgcinisihlalo wenkampani yeZITF uMnumzana Busisa Moyo uthe ukuza kukaMongameli Chapo kuyisitshengiselo sokuzimisela ekuqiniseni ukusebenzelana lokubambana phakathi kwamazwe womabili lamanye akhelane lawo.
“IMozambique iqakatheke kakhulu ngoba iyindlela yokufinyelela ezinye indawo zokuthengiselana ikakhulu iBeira Corridor. LeZimbabwe ibaluleke kakhulu ekufinyeleleni amanye amazwe akuzwekazi elisemhlubulweni ongezansi ye-Africa,” nguMnu Moyo lo.
Kusasa kuzaqhutshwa umhlangano we-Rural Industrialisation Indaba, Buyers’ Speed Networking, Zimbabwe-India Business Session, ZITF Innovators’ Forum le-Hackathon.
NgoLwesithathu kuzabe kule-ZITF International Business Conference ezakhokhelwa nguMsekeli kaMongameli welizwe uConstantino Chiwenga. Umhlangano lo uqhutshwa ngendikimba ethi: “Revitalising Industrialisation for Zimbabwe’s Economic Resurgence”. Ngasikhathi sinye kuzaqhutshwa iConnect Africa Symposium ngendikimba efanayo lapho umhlonitshwa omkhulu kuzabe kunguMsekeli kaMongameli welizwe uKembo Mohadi.
Lonyaka amazwe alethe amankampani eZITF yi-Afghanistan, Angola, Austria, Belarus, Botswana, Brazil, Canada, China, Egypt, Ethiopia, France, Germany, India, Indonesia, Italy, Japan, Kenya, Malawi, Mozambique, Netherlands, Pakistan, Rwanda, South Africa, Sweden, Tanzania, United Kingdom, United States of America, UAE, Zambia lequla le-Europian Union.
Ngaphandle kokuhlanganisa amankampani amakhulu, iZITF iphe ithuba lamabhizimusi asacathula (SMEs), akhokhelwa ngabasakhulayo labesifazane, abalimi lamakopa agxile kwezokuthungwa kwezitsha ngamalala, lezinye impahla ezenziwa ngezandla.
Minyaka yonke umbukiso weZITF uvula amathuba emisebenzi kwabatsha.
USodolobho wakoBulawayo David Coltart wamukele izethekeli ngesihle, ebabaza ukuqakatheka kweZITF kumkhonomi.
