Innocent Kurira
IHIGHLANDERS isixwayise abalandeli abafuna ukubukela umdlalo wobungane phakathi kweHighlanders leDynamos eBarbourfields Stadium ngeSonto, ukuthi bathenge amatikiti abo kusele sikhathi, njengoba kungasoze kuthengiswe amatikiti emagedini enkundla ngelanga lomdlalo.
UMaqhuzu weHighlanders uDenzil Mnkandla uthe isinqumo lesi senziwe ukuze umcimbi wokugubha iminyaka engu-100 iqembu lasungulwa uhlelwe ngendlela efaneleyo.
“Lo akusimdlalo webhola nje kuphela, kodwa yisikhathi esiqakathekileyo kumbali yeHighlanders Football Club lembali yebhola eZimbabwe,” kutsho uMnkandla.
“Ngakho sicela bonke abalandeli labathandi bebhola abafuna ukuza emdlalweni ukuthi bathenge amatikiti abo kusele sikhathi.
“Akusoze kuthengiswe amatikiti enkundleni ngelanga lomdlalo. Lesi yisinqumo esithethwe ukuze kuqinisekiswe ukuthi wonke umuntu ozabe ekhona uzajabula.”
Umdlalo wangeSonto uza ngesikhathi iHighlanders igubha iminyaka engu-100 yasungulwa, kanti iDynamos yiyo ezabe iphikisana layo kumdlalo omkhulu ohlanganisa amaqembu amabili amakhulu ebhola lakuleli.
Umdlalo lo uyingxenye yeKuzana Sport and Creative Economy Expo Zimbabwe, oqale kuliviki kuze kube mhlaka 11 Mfumfu koBulawayo, njalo yiwo ozavala umbukiso lo.
Lanxa impi yeHighlanders leDynamos ijayele ukuba lodumo, uMnkandla uthe iqembu lifisa ukuthi umcimbi lo ubemkhulu.
UMnkandla uthe ukufika kweHighlanders eminyakeni engu-100 kuyisikhumbuzo esikhulu sempumelelo yeqembu, kodwa kubuye kuvule indlela yokucabanga ngekusasa yeqembu.
“Sicela imuli yebhola ukuthi iphume ngobunengi, ithenge amatikiti kusele sikhathi. Abantu bagqoke imibala yamaqembu abo,” kutsho uMnkandla.
