Online Reporter
Fungai Muderere
I-CHICKEN INN ilokhu iledlabuzane ngaphambi komdlalo wayo weCastle Lager Premier Soccer League Week 28 le-MWOS ozadlalelwa ekundleni yeLuveve ngoMgqibelo.
AmaGamecocks afuna ukwakhela phezu kokunqoba kwawo kweviki edluleyo ukuze athole eminye imiklomelo ebalulekileyo.
Iqembu leli lingena kulumdlalo lisuka ekunqobeni iDynamos 1-0 eRufaro Stadium ngempelaviki edluleyo, impumela enike abadlali ukuzethemba okukhulu ngesikhathi isizini isisondela esigabeni sayo sokucina.
Kodwa, iMWOS ngeke idelelwe lula nje.
Amaqembu womabili ehlukaniswa ngumklomelo owodwa kuphela etafuleni, okwenza umdlalo wangoMgqibelo ube yimpi koBulawayo.
Isiphathimandla sezokuxhumana seChicken Inn, uBrighton Ncube, uthe ukunqoba iDynamos kunike abadlali umfutho omkhulu wokuzethemba, kodwa wagcizelela ukuthi ingqondo isivele isigxile kumdlalo weMWOS.
“Sidlala leMWOS kulimpelaviki, iqembu elidlala kuhle futhi elisikhokhela ngomklomelo owodwa. Singena kulumdlalo ngemva kokunqoba iDynamos sisekhaya lalo,” kutsho uNcube.
“Abafana bebelokhu bezilolonga, besebenza gadalala belungiselela lumdlalo. Umoya enkambeni muhle kakhulu, sakha kancane kancane njalo ngoMgqibelo indawo yempi yiLuveve Stadium. Sifuna imiklomelo emithathu.”
Ukunqoba kweChicken Inn phezu kweDynamos bekungekho nje ngokuthatha imiklomelo amathathu kuphela, kodwa kunikeze ubufakazi bokuthi amaGamecocks aqala ukuthola umumo wawo ngesikhathi esiqakathekileyo sesizini.
Khathesi amaGamecocks azabe elenzuzo yokudlalela phambi kwabalandeli bawo, kodwa iMWOS izafika isazi ukuthi ukunqoba kungayinceda ukuthi iqinise isikhundla sayo phezu kweqembu leli.
KumaGamecocks, injongo icacile, kumele inqobe.
Kwelinye icele, iHighlanders izabe isendleleni ibhekane le Triangle United eGibbo ngoMgqibelo.
IBosso izangena kulumdlalo ilandela ukunqoba kwayo kuHerentals 2-0.
Kusenjalo, iBulawayo Chiefs izabe ibhekane leHerentals College eRufaro Stadium ngoMgqibelo.
Amakhosi Amahle azangena kulumdlalo ezethemba ngemva kokudlulela kuma-quarter-final eMunhumutapa Super Cup, lapho anqobe khona iChilli FC 2-0.
Lokhu kwenza umdlalo lo ube ngomunye wemidlalo ezalandelwa ngamehlo abanengi.
AmaGamecocks azaphinda athembele ekusekelweni ngabalandeli bawo.
UNcube ukholwa ukuthi umsebenzi owenziwa enkundleni yokuzilolonga usubeka isisekelo sokunye ukusebenza kuhle.
KumaGamecocks, umlayezo ucacile: ukunqoba iDynamos kumele kulandelwe ngomunye umdlalo oqinileyo.
Imidlalo yePSL
Herentals College v Bulawayo Chiefs (Rufaro), Agama v Manica Diamonds (Wadzanai), ZPC Kariba v Simba Bhora (Nyamhunga), Ngezi Platinum Stars v FC Hunters (Baobab), Triangle United v Highlanders (Gibbo), Chicken Inn v MWOS (Luveve), CAPS United v Dynamos (Rufaro), Hardrock v TelOne (Chahwanda).
