YiNtatheli kaMthunywa
KUZEHLAKALO ezitshiye izakhamizi zeDandanda esigabeni seLupane zingelamathe, kulendoda eleminyaka engu-22 yokuzalwa okubikwa yahlasela imizi emine phakathi kwehola lika-2 lo 4 emadabukakusa yabulala isalukazi esileminyaka engu-69, yazama ukubulala lokudlwengula ezinye.
Izakhamizi zesiqintini seGogo eJotsholo, kazibuquthi ubuthongo kulandela ukuvuka umhlonga kwenye indoda, uProud Nyoni okubikwa ukuthi ungumakorokoza, wesiqintini lesi mhlaka 4 Lwezi ahlasele emzini yabantu phakathi kobusuku adale amacala agoqela ukubulala, ukuzama ukubulala lokudlwengula.
UNyoni wangena emzini kaGogo uGladys Ndlovu (69) wambulala ngesihluku nanko wamxhonxa ngegqamu kanengi esifubeni, entanyeni kunye lekhanda.
Kubikwa omakhelwane besizwa umkhosi bagijima bayafika emzini lo kodwa bahlangabezwa yisidumbu, silamanxeba amanengi.
Isikhulumi samapholisa esabelweni seMatabeleland North uInspector Glory Banda uqinisekise ngezehlakalo zikamhlaka 4 Lwezi.
“Amapholisa achwayisisa ngamacala agoqela elokubulala, elokuzama ukubulala, elokubamba iganyavu kunye lelokuzama ukubamba iganyavu etheswa uProud Nyoni wesiqintini seGogo,” kutsho uInsp Banda.
Uthe ngehola lika 2 ebusuku, umetheswacala wangena ngenkani endlini yokulala kaChemanai Mangena, wafika wamgongoda kanengi ngokwangemva kwehloka kodwa umamangala wenelisa ukuphunyuka wabaleka elamanxeba.
Kuthe ngehola lesithatha wayangena emzini kaGodfrey Majongwe, wafica owesifazana owayelele wafika wamethusela ngengqamu kunye lehloka wazama ukubamba iganyavu kodwa wamkhulela wadliwa ngumnyama.
Sengathi kwakungenelanga ayesekwenzile wasuka waya komunye umuzi lapho afika wavula ngenkani umnyango ethwele ihloka lengqamu.
Wathi ufuna i-US$20 kodwa ngoba umamangala wayengalayo wathi kayethatha inkukhu esilugwini.
Kubikwa umsolwa wathi ufuna bahlangane emacansini ukuze angambulali kubikwa wamdlwengula kanye wasuka wahamba.
UInsp Banda uthe esuka lapho waya emzini kaGladys Ndlovu wafika wamgwaza kanengi emzimbeni okugoqela entanyeni, esifubeni kunye lekhanda andubana abaleke. Isikhulumi samapholisa siphethe ngokucela uzulu ukuthi ancedise ukuze kubotshwe isigebenga lesi.
“Sicela ongabe elolwazi lokuthi uProud Nyoni ungaphi asazise.”
