Online Reporter
YiNtatheli kaMthunywa
IQEMBU leBulawayo Chiefs, umsekeli kamqeqeqetshi u-Agent Sawu lokaputeni weqembu uMelikhaya Ncube bajeziswe yiPremier Soccer League (PSL) kulandela izenzo zokuziphatha kubi enkundleni, ngemva komdlalo weChibuku Super Cup abawudlala leHardrock ngeSonto eChahwanda.
Amakhosi Amahle ahlawuliswe imali efika i-US$2 000, kuthi uSawu loNcube banikwe izijeziso sokubhadala i-US$500 umuntu ngamunye, okutsho ukuthi inhlawulo yonke ifinyelele ku-US$3 000.
I-PSL ithe bobathathu bayetheswe amacala ngaphansi kwe-Order 15 yeStanding Orders, Offences and Fines, elawula ukuziphatha kwamaqembu, abadlali labaphathi ngaphambi, ngesikhathi langemva kwemidlalo.
Umthetho lo uyakwenqabela ukuziphatha okungaphazamisa ukuqhutshwa kuhle komdlalo, okugoqela izenzo zodlakela, ulaka, ukubhidliza impahla lokunye ukuziphatha okungamukelekanga.
I-PSL ithe izimisele ukuqinisekisa ukuthi imidlalo iqhutshwa ngendlela elesithunzi, ngokuhloniphana langokulandela izimiso zomdlalo.
“IPremier Soccer League izimisele ukugcina ukuziphatha okuhle, ubungcwethi lokuhloniphana kuyo yonke imidlalo,” kutsho iligi kumbiko wayo.
Ukujeziswa kweChiefs labaphathi bayo kuza ngesikhathi amaqembu elungiselela ukuqhubeka kwemidlalo yesizini, njalo iPSL isikhuthaza amaqembu labadlali ukuthi balandele izimiso zokuziphatha ukuze kugcinwe isithunzi somdlalo webhola lenyawo kuleli.
