Online Reporter
YiNtatheli kaMthunywa
INGCITSHI kwezokulima sezikhuthaze abalimi ukuthi balime amaluba ngoba alenzuzo.
UNkosazana Treggy Mpofu ekhuluma lentatheli ubike ukuba abalimi abalime amaluba ngoba alemali enhle kakhulu. Uthe kuqakathekile ukuthi abalimi benze okuthiwa yi-markert survey bengakalimi ukuze bazi ukuthi umkambo wabo ufuna amaluba anjani.
“Amaluba alendlela zokuthi nxa usiyawathengisa abotshwa njani, njalo umlimi mele abekwazi ukuthi umkambo ofuna ukuthenga amaluba akhe bafuna ama-stems abotshwe nge 5-5 kumbe nge 10-10 njalo ayabe sevuthwe okunjani. Ngingapha umzekeliso wama-roses angavuthwa amanye ayabe evulekile amanye e-half open amanye njalo evalekile, amanye ayabe e flat,” kutsho uNkszn Mpofu.
Uthe umlimi mele abekwazi ukuthi umkambo wakhe yi-local kumbe yi-export ukuze alime elelolwazi ukuthi uzalima okunganani.
“Umlimi kumele abekwazi ukuthi umkambo wakhe yi-local kumbe yi-export market ukuze elime elolwazi ukuthi ulima okunganani njalo ukhangelele ukuthi athole malini. Okunye njalo amaluba ayafakwa emabhokisini njalo nxa eku-green house siqalela kokuthiwa yi cold chain ku-green house. Esuka ku-green house ayafakwa kumabhakede emanzini aqandayo njalo ayelatshwa kusetshenziswa umlilo kumbe imithi, bengawelapha sebewabisela emabhakedeni besewafaka ku-cold room,” kutsho uNkszn Mpofu.
Uthe amaluba engafakwa ku-coldroom ayasuswa esesiya kugrading, abesefakwa emabhokisini.
“Amaluba engafakwa ku-cold room ayasuswa abesesiya kugrading ebesefakwa emabhokisini kusiya ngokuthi anganani. Okunye njalo i-stem length le-stem thickness kumele kufanane ebesebotshwa ngama-bunches, angafakwa ngama-bunches sebekwa emabhokisini. Nxa engawo kuthengisela phandle kwelizwe (export markert) ibhokisi elilodwa liyabe libhaliwe ukuba liyathwala amaluba angaka. Nxa kuyi-local market amaluba kumele njalo elatshwe ngokufanayo lawe-export market kusukela ku-green house ukuze ahlale emahle njalo kumele umlimi enze amaluba akwazi ukuthi ayahlala isikhathi eside engonakalanga ukuze engaphangisi ukubuna,” kuphetha uNkszn Mpofu.
