Online Reporter
Nkosilathi Sibanda
AMAPHOLISA eZimbabwe Republic Police (ZRP) esabelweni seMatabeleland North asevuselele ngokusemthethweni i-Client Service Charter eMahamba Business Centre, eNyathi, ngenhloso yokuqinisa ubudlelwano phakathi kwamapholisa lomphakathi lokuthuthukisa indlela yokuletha usizo emphakathini.
Umkhosi lo ubukhokhelwa ngu-Officer Commanding eMatabeleland North, uCommissioner Stephen Kazingizi njalo bekulenkokheli zomdabu, abammeli bamabhizimusi, iziphathamandla zikaHulumende lezakhamizi.
Ukuvuselelwa kweClient Service Charter kuza ngesikhathi iZRP iqhubeka ngemizamo yokwenza umsebenzi wamapholisa ube sobala njalo ube lendlela ecacileyo yokuphatha izikhalazo zikazulu.
Ekhuluma emkhosini lo, uCommissioner Kazingizi uthe i-Client Service Charter yisifungo sokuthi amapholisa azasebenza ngobuqotho, ngenhlonipho langokwethembeka ekuphatheni uzulu.
Uthe amapholisa afuna ukuthi umphakathi wazi amalungelo lezinga lesiphatho okumele aluthole nxa efuna usizo emapholiseni.
Ngemva komkhosi, amapholisa enze umkhankaso wokuhamba ezitaladeni zeMahamba Business Centre lapho abexoxa khona lezakhamizi.
Amapholisa abike ukuba izakhamizi ezazikhona zamukele inyathelo leli ngenjabulo.
Inkokheli zomdabu kanye labosomabhizimusi zincome amapholisa ngokuvuselela isivumelwano sabo lomphakathi ngoba kuzanceda ekwakheni ubudlelwano obuqinileyo phakathi kwamapholisa lomphakathi, okuzaphathisa ekwehliseni ubugebengu lokugcina ukuthula eMatabeleland North.
