admin
“Awudlanga inyama nxa ungakhukhuzanga ithambo wagqula lomnkantsho wabususa bonke ubutshada,” kutsho amaNdebele esekhuluma ngenyama.
Indoda yayiyindoda ngesibaya senkomo zihlala zilele ngophondo. Nxa kuhlatshiwe yayidliwa impela inyama lapha ekhaya kuze kutshayanwe ngayo, kukhukhuzwe amathambo kugqulwe leminkantsho.
Asiyidleni lalamuhla inyama isesekhona siyipheke isintu sikholise. Amathambo singawathenga ezilaheni (butcheries).
Laweke pheka ongakupheka lapha ohlezi khona lidle lemuli yakho likholise.
Asidleni sisaphila sikholise ubumnandi benyama yenkomo.
Lamuhla abantu sebethanda ukudla inyama yenkukhu. Zaphela inkukhu amakhanda du.
Amaqebelengwana lamathambo du kuyadliwa ngempela akudlalwa nxa sekudliwa inyama.
“Asazi wena ongasela mazinyo uzayikhukhuza ngani inyama elamathambo, kukondoda iyazibonela lapho sekudliwa inyama. Dlana santando, uze utsho lokutsho ukuthi atshi ukuswela amazinyo, ngihlafune ngani? Njengoba kuyizikhewu zodwa nje lapha emlonyeni?
Amathambo lamaqebelengwana efulawa
Okudingakalayo
– Amathambo lamaqebelengwana efulawa alingana imuli yakho ezakudla
– Amathambo lomnkantsho omnengi
– Ibhodo kumbe imbiza enkulu yokupheka
– Amanzi aqandayo lesawudo
– Ifulawa ngenkomitsho zetiye ezine
– Imvubelo ngenkomitsho zetiye ezimbili (baking powder)
– Umganu wokuhlanganisela
– Iphini lelembu lwekusula izandla
– Umlilo wokuphekisa
Ukupheka
– Geza izandla uzesule ungakabambi konke ozakupheka.
– Gezisa amathambo anduba uwapheke.
– Amathambo athatha isikhathi eside ukuvuthwa.
– Wayekele avuthwe ngomlilo olingeneyo.
– Yekela asale elokhu elomhluzana omnengi elokhu exhwatha eziko, wena lungisa lokhu:
– imvubelo lefulawa
– Thatha inkomitsho ezine uzithele emganwini wokuhlanganisela.
– Thela imvubelo (baking powder) ngenkezo ezimbili zetiye.
– Thela amanzi lesawudo uhlanganise kuze kube yinhlama emanzana okungani kuqinaqinile.
– Khana inhlama le ngokhezo lokudla uyifake nganye nganye embizeni elamathambo uvale, ubusuyekela kubile okwemizuzu emithathu.
– Vula imbiza ukhe njalo enye inhlama wenze njengakuqala inhlama yonke ize iphele.
– Lokhu kuzakuba yikuphela kwamathambo kusale nje umhluzi embizeni.
Ukudliwa
-Phakulula amaqebelengwana uwabeke emganwini.
-Phakululela amathambo eceleni kwamaqebelengwana.
– Thela umhluzi phezu kwamaqebelengwana.
-Dlana ngokhezo.
– Dobha ithambo ngalinye ize iphele inyama
– Vula lapho okuvalwe ngenhlama.
– Qoqoda umnkantsho uwudle wonk.e
– Ungatshebisa isitshwala, irayisi, amatshakada. “Dlana ukholise kumnandi bo!”
Online Reporter