Online Reporter
Bhekimpilo Tshalibe
INHLANGANISO ye-Agritex isikhuthaze abalimi abasemaphandleni lemadolobheni ukuthi bafuye amathendele ngoba elemali emangalisayo.
UMnumzana Edmore Chikowa ongu-Livestock Officer kunhlanganiso ye-Agritex koBulawayo ukhuthaze abalimi ukuthi bafuye amathendele ngoba angenza umlimi azitholele inzuzo emangalisayo.
Uthe amathendele adinga ukuba akhelwe isilugu ukuze avikeleke kumumo womkhathi omubi.
“Sikhuthaza abalimi ukuthi bakhele amathendele izilungu bewahlalise ngokulingana kwawo njalo behlalise amakhulu wodwa lamancinyane wodwa,” kutsho uMnu Chikowa.
Ukhuthaza abalimi ukuthi bakhe izilugu ezibetha umoya.
“Sikhuthaza abalimi ukuthi bakhe izilugu ezilobubanzi obungaba yi-10 metres ukuze kungene kuhle umoya esilugwini, njalo bafake le-mesh wire encinyane engaba yi 13 kusiya ku-25mm ukwenzela ukuthi amathendele engafohlisi amakhanda kucingo ecine ebanjelwa,” kutsho uMnu Chikowa.
Uthe ukhuthaza abalimi ukuthi bengahlalisi amathendele endaweni emanzi.
“Sikhuthaza abalimi ukuthi befake isamende esilugwini samathendele njalo befake lomgelo ozancedisa ukuthi kuphume amanzi phandle kwesilugu ukuze kuhlale komile phakathi, amathendele akhudumale,” kutsho uMnu Chikowa.
Uthe amathendele kawafuni kuhlaliswa elangeni okwesikhathi eside.
“Sikhuthaza abalimi ukuthi bakhe izilugu zamathendele bezikhangelise entshonalanga ukwenzela ukuthi amathendele engabiselangeni isikhathi eside,” kuphetha uMnu Chikowa.
