UKUHANJISWA kwembiko kulezinsuku sekulula kakhulu ngenxa yokuza kobulembu bamakhompuyutha kanye labomakhalekhukhwini.
Lokhu sekusenza ukuthi abantu babe lolwazi ngezinto ezitshiyeneyo masinyane njalo lula. Impucuko yokuhanjiswa kwembiko masinya iphathisa njalo abafundi ezikolo, emakolitshini kanye lakumaYunivesithi.
Abafundi bayenelisa ukuthola ulwazi ngezifundo zabo ezitshiyeneyo abazenzayo ebulenjini ngesikhatshana nje okwenza kubelula ukuchwayisisa ngezifundo zabo. Ngokunjalo abafundi sebesebenzisa amakhompuyutha kanye labomakhalekhukhwini ukuze baphumelele ezifundweni zabo.
Lanxa kungekho okubi ngokuthi abafundi basebenzise indlela zakulezinsuku ukuthuthukisa imfundo yabo uhlupho nje yikuthi bacina besebenzisa indlela lezi ngendlela engaqondanga.
Lokhu kugoqela ukubukela imifanekiso engalunganga kumbe ukudinga amajaha kanye lamantombazana ebulenjini, kukanti abanye njalo abafundi bacina bengena kunkolo kanye lendlela zokuziphatha ezingaqondanga ngenxa yokuthathwa ludumo lokusebenzisa ubulembu.
Yikho nje ezikolo ezinengi kuleli kungavunyelwa ukuthi abafundi babe labomakhalekhukhwini kumbe amakhompuyutha esikolo njalo lo obonakala ekwenza lokhu uyajeziswa.
Kwezinye izikolo kuthi loba amakhompuyutha evunyelwa kodwa bangaze benelisa ukusebenzisa i-wifi ngoba kusaziwa ukuthi abafundi balakho ukucina besebenzima imitshina le ukungena ebulenjini bedinga izinto ezingelani lezifundo kodwa ezokuganga.
Lokhu kwenzelwa ukuthi kwenqatshelwe ingozi yokuthi abafundi baphazamiseke ezifundweni zabo ngoba sebethatheka ngobulembu.
Kuyadingeka ke ukuthi kubelendlela zokulawula ukusetshenziswa kwempahla lezi eziqinileyo ezizenza abafundi bangagangi bezisebenzisa ngasikhathi sinye babe bevikelekile ngoba impahla le yiyo eyikusasa yalelilizwe lomhlaba wonke jikelele.
Imitshina le iqukethe ulwazi olulakho ukuphathisa abafundi ezifundweni zabo. Iqukethe njalo lekusasa lomhlaba wonke jikelele okuzenza ukuqhutshwa kwemisebenzi eyehlukeneyo kubelula.
Kuliqiniso ke lokhu ngoba ubulembu bulempendulo zemibuzo etshiyeneyo yezifundo ezenziwa ngabafundi esikolo.
Kungumbono waleliphephandaba ukuthi indaba yokusetshenziswa kwabomakhalekhukhwini kunye lamakhompuyutha ezikolo kudinga ukuthi kuchwayisiswe okuzwayo ngoba ukuvinjwa kwakho ezikolo kungabisela emuva ezemfundo zakuleli kukanti zona beziqakathekiswa kakhulu. Kuyadingeka njalo ukuthi kube lezindlela zokuthi loba umntwana esebenzisa ikhompuyutha kumbe umakhalekhukhwini wakhe umzali enelise ukuthi abone lokhu umntanakhe akuhlolisisayo ukuze enelise ukumlawula.
