shloboe boe
Ethel Ncube
ABABONA ngezifuyo abeVeterinary Services sebexwayise abalimi abagcina inkomo ukuthi bananzelele inkomo zingabanjwa ngumkhuhlane womkhono ngoba ulakho ukubangela ukuvalwa kwesibaya.
UDokotela Clifford Tshuma onguVeterinary Research Officer koBulawayo uxwayise abalimi abagcina inkomo ukuthi bananzelele inkomo zabo zingahlaselwa ngumkhuhlane womkhono. Uthe umkhuhlane lo ubangelwa yikudla okungcolileyo.
“Umkhuhlane womkhono uhlasela inkomo zingadla utshani obulamagcikwane (bacteria spores) ayiwo abangela i-black leg. I-bacteria leyo iyangena emzimbeni igcwale umzimba wonke ihanjiswa ligazi ibe isisiyahlala emsipheni.
“Kuthi ke ngemva kwesikhathi ama-bacteria spores asemsipheni ayakhula azalane abemanengi abangele itshefu ebangela i-necrosis yemisipha lokuphuma igazi,” kutsho uDkt Tshuma.
Uthe umkhuhlane womkhono uyingozi ngoba kawelapheki njalo ulendlela obonakala ngayo enkomeni.
“Umkhuhlane womkhono uyingozi ngoba kawelapheki. Inkomo esihlaselwe ngumkhuhlane lo iyawoma umhlubulo ibuye ikhwele ukutshisa komzimba.
“Inkomo ingahlaselwa ngumkhuhlane lo kudingeka ukuba umnikazi wayo ayihambise kwabeVeterinary Services ukuze ihlolwe,” kutsho uDkt Tshuma.
Uqhubekele phambili esithi ukhuthaza abalimi ukuthi bengabona inkomo zabo sezigula babuye lazo kubodokotela ukuze zihlatshwe amajekiseni.
“Ngikhuthaza abalimi ukuthi bengabona inkomo zabo sezigula bebuye lazo kubodokotela zizohlolwa bengaze bagijimela ukuthenga imithi.
“Okunye njalo inkomo ingazifela sikhuthaza abalimi ukuthi bebuye layo eVeterinary izehlolwa imbangela yokufa kwayo ukuze kubonakale ukuthi ibulelwe yini,” kuphetha uDkt Tshuma.
Online Reporter