Online Reporter
Ethel Ncube
INKOKHELI zomdabu esigabeni seNyamandlovu sezikhuthazwe ukuba ziphatheke ekulimeni insimu zesiphala seNkosi ngoba siluncedo kumphakathi.
Usobhuku uCharity Bhebhe ukhuthaze inkokheli zomdabu ukuthi zibe yingxenye ekulimeni ensimini yesiphala seNkosi ngoba siba luncedo kumphakathi oswelayo nxa kungenzeka kube lendlala.
“Thina esigabeni sethu silensimu esiyilima siyizakhamizi zonke. Wonke umuntu uyaphatheka ekulimeni, ekuhlakuleni, ekuvuneni kuze kuhululwe umumbu.
“Lonyaka lapho ebesilime khona okwakhathesi sesivune inqola ezihlanu. Omunye lokhe usesemasimini. Singaqeda ukuwuhulula siyabhala phansi ukuthi sithole okunganani sihambise enduneni. Induna yiyo ezatsho ukuthi senzanjani. Esikhathini esinengi iyathi sikhangele lapho umangoye aselala khona eziko bacutshelwe baphiwe,” kubika uNkkz Bhebhe.
Ubuye waveza ukuba izakhamizi kumele zikhuthalele ukulima esiphaleni seNkosi ngoba kuyasiza.
“Izakhamizi labosobhuku ezigabeni ezitshiyeneyo kumele babone ukuba isiphala seNkosi siyathola umumbu ngokubona ukuba insimu ilinyiwe njalo inakekelwe kuze kuvunwe.
“Ukuba lesiphala seNkosi kuyasiza ekutheni nxa kungenzeka kube lendlala abantu bayasizakala masinyane ngoba ukudla kuvele kukhona,” kuphetha uNkkz Bhebhe.
