Online Reporter
Nkosilathi Sibanda lo-Innocent Kurira
OSAPHETHE isikhundla sikamqeqetshi weHighlanders uTry Ncube, uthe iqembu lakhe sekumele liqale ukuhlasela nxa lifuna ukunqoba, nanko ngoLwesine lidibana leTriangle enkundleni yeBarbourfields, kumdlalo we-Castle Lager Premiership.
UNcube ubhekane lenqwaba yomsebenzi njengoba esenqobe kanye lokhe wathatha intambo, kusuka uKelvin Kaindu.
Isimo lesi kasijabulisi abalandeli beqembu. Umqeqetshi lo, maviki wonke uqina ngokuthembisa ukuthi bazadlala ngcono, kodwa impumela ngemva kwemidlalo iveza okutshiyeneyo.
“Sidlalela ekhaya, ngakho kumele siqine ngokuhlasela kusukela ngempembe yokuqala ukuze sifake izethekeli uvalo,” kutsho uNcube ngesikhathi ekhuluma lentatheli ngamalungiselelo omdlalo wabo leTriangle.
“Singabe sikhangele ilogu, sithi iqembu esidlala lalo, eleTriangle liyasadalala, ikanti lisilungiselele ngoba lifuna ukuthi ligcine indawo yalo. Liqembu okungamelanga silidelele.”
IBosso iphenduka eMagumeni ngemva kokutshaywa yiScottland 2-1 ngeSonto. UNcube uthe badlala kuhle kulumdlalo, ukwedlula eminye. Loba encoma ukugijima kwabafana bakhe, lumqeqetshi uyavuma ukuthi kumele balungise okuthile, ikakhulu kubagadli, lasesiswini senkundla.
“Singabe sidlale kuhle leScottland kodwa akutsho lutho nxa singatholanga imiklomelo yonke. Ngakho, kumele sikhaliphe, siyitshaye iTriangle.”
Kusenjalo, iHighlanders kayisoke ibelomdlali wayo u-Andrew Mbeba, okubikwa walimala ingqagala kumdlalo wabo leScottland.
“Silinde umbiko wabodokotela njengoba kwenziwe ama-scan. UMbeba uzabe engekho, kodwa silabo abadlali abenelisa ukudlala endaweni yakhe. Silethemba abadlali laba bazakwenza okungcono.”
UNcube ukhalaze ngohlelo lwemidlalo kuPSL, ebika ukuba abadlali baswela isikhathi sokuthi balungisele.
Kweminye imidlalo ekhona ngoLwesine, iDynamos yamukela iManica Diamonds eRufaro Stadium, iBikita Minerals izabe idlala leScottland eGibbo.
Kunzima enkambeni yeDynamos njengoba isibalelwa kulezo ezizaqunywa lizembe, zisiya enkundleni zika-Division One.
Intshantshu zakudala lezi zihlezi kunombolo yesi-17 kungalane yamaqembu, iphethe imiklomelo engu-15. Selinqobe kwemibili kuphela.
Imidlalo yeCastle Lager Premiership ngokugcweleyo ngoLwesine:
Dynamos v Manica Diamonds (Rufaro), Highlanders v Triangle (Barbourfields), Bikita Minerals v Scottland (Gibbo)
