Online Reporter
Ethel Ncube
KULENINA lakoBulawayo eselizakhele udumo ngokufuya inkomo, eselikhuthaze abanye abesifazana ukuthi bangesabeli khatshana ukufuya inkomo ngoba
UNkosikazi Thokozile Moyo ofuya esepulazini eliphambi-dlwana kwegceke lendizamtshina leJoshua Mqabuko, owaziwa ngokuthi ngu-Otan Brahman, ufuye inkomo zomhlobo wama-Brahman njalo uthi amnika imali enhle nxa ewathengisa.
Ekhuluma lentatheli embukisweni wezokuthengiselana osanda kwedlula, oweZimbabwe International Trade Fair, uNkkz Moyo ubike ukuba ukufuya kwenza umuntu enelise ukuziphilisa lemuli yakhe.
“Ngaqala ukufuya ama-Brahman la alombala oluthuli ngomnyaka ka-2019 ngilenkomo ezinhlanu, khathesi sengilenkomo ezingu-80. Ukufuya kufuna umuntu ozimiselayo, azinikele aphinde abekezele.
“Inkomo kumele ubone ukuthi uyazikhangela kokuphela njalo ukufuya inkomo asobhizimusi ongalenza ngomakhalekhukhwini kodwa kumele ubekhona, ubone ukuba inkomo zakho ziphilile njalo zilokudla.
“Ngiyasebenza lapha koBulawayo kodwa sonke isikhathi ngihlala ngihambile epulazini ngisiyakhangela inkomo njalo nxa zidibha, ziyafafazwa yinye ngayinye zize ziphele zonke zingu-80. Angihlali isikhathi ngingahambanga ukuyakhangela ukuba inkomo zinjani njalo nxa kufuneka ukudla kwazo ngiyagijima ngiyefika khonale ngoba ngiyabe ngifuna ukuba zikhule kuhle njalo zibe zinkomo ezilonhlonzi lesisindo,” kubika uNkkzn Moyo.
Ubuye waveza ukuba inkomo eyodwa ithengiswa ngemali enhle kakhulu.
“Nxa ngingenisa inkomo yami emkambo ithengwa ngemali ephakathi kwe-US$4 000 kuthi ezinkulu zibiza US$8 000, ngisala ngikhudumala sibili esikhwameni nxa sezithengiwe.
Uphinde wakhuthaza labo abafisa ukufuya ukuthi kubalulekile ukuba babe lobudlelwano obuhle lezisebenzi zabo ukuze inkomo zabo zigcinakale.
“Okunye okumele ukunanzelele nxa ufuya, yikuba lobudlelwano obuhle lezisebenzi zakho njalo uzifundise lazo ngenkomo, zibekwazi ukuthi kungaba lohlupho ziyakubikela masinyane,” kutsho uNkkz Moyo.
Ukhuthaze abesifazane ukuthi bangesabi ukungena kubhizimusi yokufuya inkomo loba kungathi abanengi abazifuyayo ngabesilisa.
“Ngithanda ukukhuthaza abesifazana ukuthi bangesabi ukungena kubhizimusi le, lami ngaqala ngilovalo kodwa hayi ngokubekezela langokuzimisela sengikwazi ukuqhuba kuhle ibhizimusi yami.
Uphethe ngokuthi njengomfuyi, ulohlupho lokungabi lendawo engeyakhe.
“Uhlupho engilalo njengomfuyi yindawo yokufuyela, lapho okulenkomo zami indawo akusi yami, ngiyabhadala ukuzigcina lapho.
“Ngifisa ukuba ngithole indawo engeyami ukuthi ngifuyele khona inkomo zami,” kutsho uNkkz Moyo.
