Online Reporter
Muchaneta Chimuka
KUCHANGE kusingadanwi anonzwa kumakwikwi makuru ekuvhetemesa motokari, ayo achaitwa nomusi weSvondo, 7 Gunyana 2025, kuBorrowdale Racecourse, muHarare.
Mutambo uyu weSelekta Base BlowOut Festival, uyo uchange uchikotsverwa naDJ Selekta Base, wakakosha pakuti unovaraidza nekunyevenutsa pfungwa.
Unoitwa gore negore, apo vanhu vanofarira nyaya dzekuvhetemeswa kwemotokari uye vane unyanzvi munyaya dzemimhanzi vanenge vakati ti-i.
Achitaura nemunyori uno panhare, Dj Selekta Base, zita rake chairo riri Anorld Chingwererwe, anoti kuchange kuine mibairo yakati wandei ichapihwa vachakunda mumakwikwi aya.
“Tichange tichitengesa matiketi eraffle nemuripo mudiki weUS$5. Achatora mubairo wokutanga achaenda kumba neiPhone 16 Pro Max. Mubairo wepiri iGalaxy A9 tablet, kuchizoti mubairo wetatu maheadphone. Hakuna anodzokera kumba asina chaakabata nokuti izuva rekufara nekucherechedza kukosha kwemotokari munyaya dzemitambo.
“Mitambo yekuvheyesa motokari ndeyemazera ose uye kune vechidiki, uyu ndiwo mukana wekutandadza pfungwa, tichiti zvakare kwamuri siyai zvinodhaka nokuti zvinoparadza upenyu,” anodaro.
Anoti mitambo iyi ichapindwa nemaspinner emunyika muno nemamwe achabva kuSouth Africa, ayo ari kuvimbisa mitakunanzva yemitambo.
“Vanhu havasi kuzongoona kuvhetemeswa kwemotokari bedzi asi vachawaniswa mimhanzi yemhando yakasiyana-siyana kubva kuvaimbi vakadai saFreeman HKD, Nutty O, Sano Wav naSilent Killer, uyo achange achitsigirwa naDJ Rax, Rawse, Atlanta Kid naMadeHerBelieve, saka kuchange kusingadanwi anonzwa,” anodaro
DJ Selekta Base anoti mitambo iyi ichatanga na11 mangwananai kusvika 6 manheru, nokudaro anovimbisa mhuri dzichapinda muchirongwa ichi kuti dzichatakura nhoroondo huru maringe nezvichitikako.
