Online Reporter
Nqobile Bhebhe
AMAFEKITHALI akade avalwa asedolobheni lakoBulawayo kumele aguqulwe abe ngama-call centre kumbe indawo ezicubungula ulwazi, zihambelane lokuguquka komhlobo wamabhizimusi umhlaba wonke.
Lokhu kukhulunywe nguMphathintambo wogatsha lwezemali, ukukhula komkhonomi, uSikhwicamfundo uMthuli Ncube ngesikhathi kulomhlangano wokucubungula lokubekwa kwemibono mayelana lebhajethi yelizwe eka2026.
Umhlangano lo, obuqoqwe yiZimpapers ndawonye leConfederation of Zimbabwe Industries (CZI), ubusenkundleni yeZimbabwe International Trade Fair, koBulawayo ngoMvulo ekuseni.
USikhwicamfundo uNcube uthe uHulumende ulenyathelo lokusekela inguquko le. Ukhulume lokhu ngemva kweviki kwethule uhlelo lwebhajethi yelizwe.
Ubike ukuba lesi yiso isikhathi sokuthi idolobho lakoBulawayo libe yindawo yamabhizimusi la abizwa ngokuthi yiBusiness Process Outsourcing (BPO) lawe-Knowledge Process Outsourcing (KPO). Uthe uHulumende usevumele ukuvulwa kwenhlelo zamabhizimusi la, evulela ukuthi alingane lalawo agxile ekuthengiseni impahla kwamanye amazwe.
“Kulodaba lwama-call centres. Kubhajethi yethu kulalapho okukhulunywa ngama-BPO. La ngama-call centre akhangelane lebhizimusi lokuxhumana, ama-ICT,” kutsho uSikhwicamfundo uNcube.
“Sesinikeze usekelo lwe-special economic zone kulolugatsha lwebhizimusi, okuzaphathisa labo abakulo ukuthi basebenze lama-client aphetsheya.
“Sifuna ukuliqhuba lelibhizimusi. Ngakho ke, ngikhangelele ukuthi amafekithali akoBulawayo abelamabhizimusi ama-BPO lama-KPO kusiyaphambili.”
Uthe inyathelo leli lizavula amathuba emisebenzi kwabasakhulayo, kube lemali yamanye amazwe evela ekuthengisweni kwemisebenzi lenhlelo ezigxile ku-ICT.
