Online Reporter
Brandon Moyo
AMAQEMBU lomdlalo we-rugby i-Highlanders lePanthers aqale ngokuzimisela kumidlalo yawo yokuvula isizini ka-2025 koBulawayo Metropolitan Rugby Football Board (BMRFB) Archer Clothing Under-20 League.
Ngalinye liphumelele ukunqoba kabili kumidlalo yokuvula isizini le. Okwamanje amaqembu la akhokhela ingalane ephethe imiklomelo eyisitshiya galolunye iqembu ngalinye. Isigaba sesibili semidlalo siphele eHartsfield Rugby Grounds ngoMgqibelo odluleyo, iPanthers ikhokhela.
Ngalelolanga, iPanthers idlale lePlumtree High yanqoba nge 15-12. Isilemiklomelo engu-88, yehluleka ukuthola engu-12 okutsho ukuba ile-+78 score difference, okwenza ibephezulu kweHighlanders.
IHighlanders, ekunombolo yesibili yanqoba iMatabeleland Warriors nge 12-0 njalo iphethe i- +70 score difference, ebehlukanisa lePanthers.
Ekhuluma ngemva kokunqoba kwabo amaWarriors, omunye wabaqeqetshi beqembu leHighlanders, uTrust Sibindi, uveze ukujabula ngokuqala kweqembu kulumkhankaso. Uthe ukuzimisela okwenziwa ngabadlali sokuqala ukuba lezithelo.
“Sijabule kakhulu. Leli liqembu labafana abancane abasacathula. Ukunqoba kabili imidlalo ilandelana kutsho okukhulu kithi.
“Siyakujabulela ukunqoba kabili njalo besisebenza nzima nsuku zonke. Ngiyajabula ukuthi impumela isibonakala,” kutsho uSibindi.
Njengoba kukhokhela iPanthers leHighlanders intshantshu zomnyaka ka-2023 iChristian Brothers College (CBC) Hornets ihlezi endaweni yesithathu ngemiklomelo eyisithupha kulandela ukunqoba kwayo iBulldogs nge 53-0.
Intshantshu zanyakenye, i-Old Miltonians (OMs) iqale kuhle inqoba iMatabeleland Lions nge88-0. Umqeqetshi we-OMs, uTawanda Mhora uthe uyathokoza ngokuthi abafana bakhe bavule isizini ngesivuvu.
I-OMs lamaWarriors zibambene ngemiklomelo emihlanu. Kunombolo yesithupha, kulePlumtree High. I-Bulldogs ikunombolo yesikhombisa, iLions isekucineni njalo kayiphathanga lutho.
Kumdlalo wabesifazane, kukhokhela iBulldogs kulandela ukunqoba kumidlalo emibili. IHighlanders lePanthers azikanqobi. Ngeviki edluleyo, iBulldogs inqoba iHighlanders 15-5.
Imidlalo iyaqhubeka ngempelaviki kusigaba sesibili seligi le.
