Nkosilathi Sibanda
AMALUNGA eNational Prosecuting Authority of Zimbabwe (NPAZ), asebenza koBulawayo ngeviki edluleyo ahlanganyele ndawonye lomhlaba wonke jikele kumkhankaso wokuqaphela imvukuzane yamabele i-Breast Cancer Awareness Month, egcizelela ukuqakatheka kokutholakala kwesifo lesi masinyane, ukuhlolwa ngezikhathi zonke kanye lokuthatha amanyathelo okuvikela impilo zabo.
Kumbiko wakhe, uMtshutshisi Omkhulu uJustice Loice Matanda-Moyo obemelwe nguMsekeli wakhe uNkosikazi Tariro Takuva, ugcizelele ngokubaluleka kokuhlolwa, ebalisa njalo ukuthi imvukuzane yamabele ihlasela abesifazane kanye labesilisa.
UMtshutshisi Omkhulu ukhuthaze abatshutshisi bonke elizweni ukuthi banakelele impilakahle yabo, ebika ukuthi lokhu kwenza basebenze ngokuzimisela, kuphakamise lendlela ugatsha lwezemithetho olusebenza ngayo.
Isethula ngokwenzakale kulumbuthano, i-NPAZ ithe: “Bekulenhlanganiso yeLIFT Foundation, iZimbabwe Republic Police Women’s Network, lamanye amalunga omphakathi ake ahlaselwa yimvukuzane yebele ababelane ulwazi ngokuzinakekela lokuhlolwa ngodokotela masinyane.
“Umbuthano lo ubeyisikhumbuzo sokuthi umkhankaso wemvukuzane yamabele awupheleli ekukhulumeni lasekugqokeni umbala oyi-pink, kodwa udinga ukubambana, ukufundisana lokuncedisa lalabo abalwisa umkhuhlane lo,” kutsho iNPAZ.
