Online Reporter
Yintatheli kaMthunywa
UMONGAMELI weZimbabwe Football Association uNqobile Magwizi uthe ukufakwa kohlelo lwe-Video Assistant Referee (VAR) kuleli kuzakuba linyathelo elikhulu ekuthuthukiseni umdlalo wenguqu.
UMagwizi uveze lokhu kulandela amacebo okufaka imitshina ye-VAR eNational Sports Stadium, kulandelwe enkundleni yeRufaro, eHarare laseBarbourfields koBulawayo.
Uthe iZIFA iyajabula ngokubambisana lenkampani yeSakunda Holdings ekuletheni imitshina le.
“Esikhathini lapho imitshina yakulezinsuku isiyingxenye eqakathekileyo yomdlalo, ukuba leVAR eNational Sports Stadium linyathelo elikhulu hatshi kuZIFA kuphela kuzo zonke ingatsha zomdlalo,” kutsho uMagwizi.
Uthe inhloso yikuthi iVAR ifakwe kuzo zonke inkundla ezinkulu, kodwa umsebenzi uzaqalisa eNational Sports Stadium.
“Sifisa ukuba leVAR kuzo zonke inkundla zethu ezinkulu, kodwa siyabonga kakhulu iSakunda Holdings ngokubambisana lathi ekufakeni iVAR eNational Sports Stadium kuqala, kulandele eRufaro leBarbourfields.”
UMagwizi uthe ukufakwa kweVAR kuhambelana lomsebenzi wokulungiswa kutsha kwenkundla yeNational Sports.
Ukufakwa kweVAR kukhangelelwe ukuthi kuthuthukise indlela imidlalo eqondiswa ngayo, ikakhulu kuzinqumo ezinzima ezenziwa ngonompembe.
