YiNtatheli kaMthunywa
I-ZIMBABWE Revenue Authority (Zimra) ivumbulule imbhobho eyisikhombisa kanye lenhlamvu zokudubula ezingu-170 zohlobo lwe-9mm zifihlwe ebhasini ebisuka eSouth Africa isiya koBulawayo, kumgcele weBeitbridge.
Imbhobho le, ibanjwe yizinja eziqeqetshiweyo zeZimra i-K9 ngoLwesihlanu ekuseni ngehola lika-3, ngesikhathi iziphathamandla zeZimra zihlola amabhasi angena elizweni.
Ngokutsho kweZimra, iziphathamandla zayo zithole izikhali lezi ngemva kokuba inja eqeqetshiweyo ebizwa ngokuthi nguPoncho itshengise ukuthi kukhona okutshaya amanzi ngaphansi kwezitulo eziphambili, ezingemva komtshayeli.
Ekuhlolisiseni, kutholakale imitshaqana emibili ebifakwe phakathi kwepulastiki emnyama yabuye yanamathiselwa.
Ekuvulweni kwemitshaqana le, iziphathamandla zithole imbhobho emnyama eyisikhombisa kanye lenhlamvu zokudubula ezingu-170 zohlobo lwe-9mm blank ammunition.
Umtshayeli webhasi uvumile ukuthi uphathiswe imtshaqana le, eSouth Africa ukuthi ayeyitshiya koBulawayo, lanxa ethe ubengakwazi ukuthi phakathi kulezinto ezingekho emthethweni.
Ngemva kokutholakala kwezikhali lezi, umtshayeli webhasi uhle wabotshwa ngamapholisa njalo uphenyo lusaqhubeka.
Izibhamu kanye lenhlamvu zokudubula ezabanjwayo kulinganiselwa ukuthi kubiza i-R21 400, okungaba yi-US$1 250. Izikhali lezi zihle zathathwa ngokusemthethweni ngaphansi kwe-Notice of Seizure 047464L.
Kusitatimende, i-Zimra igcizelele ngokuqakatheka kwezinja eziqeqetshiweyo ekulondolozeni ukuvikeleka kwelizwe.
“Isehlakalo lesi sitshengisa ukuqakatheka kwezinja zethu ze-K9 ekulwiseni ukungeniswa kwempahla eyingozi elizweni ngokungekho emthethweni kanye lezinye indlela zokweqa imingcele kusenziwa izinto ezingavunyelwayo,” kutsho isitatimende lesi.
Iziphathamandla zeZimra zikhumbuze izihambi kanye labamabhasi ukuthi kumele balandele imithetho yelizwe, egoqela ukungangenisi impahla elizweni ngokungekho emthethweni njalo lokusebenzisa kuphela indawo ezisemthethweni zokungena elizweni.
IZimra iphinde yathi ukwehluleka ukubika impahla engeniswa elizweni kulicala ngaphansi kweSigaba 182 seCustoms and Excise Act. Icala leli lingabangela ukuthi umuntu athoniswe njalo abuye athathelwe zonke impahla zakhe nguhulumende.
“IZimra izimisele ukuqhubeka ivikela imali engena kuHulumende, ivikele imingcele yelizwe ekuthengiselaneni okungekho emthethweni njalo iqinisekise ukuthi impahla yonke engena eZimbabwe ilandela imithetho yempahla engeniswa kumbe ehanjiswa ngaphandle kwelizwe.”
