Lovemore Dube
NXA besithi iHighlanders yithimu yezwe lonke, bakutsho ngoba ilabalandeli abanengi, abangena bagcwalise inkundla kuyo yonke imidlalo.
Ubukhulu beHighlanders bubonakele ngeSonto edluleyo, ngesikhathi kulomdlalo wobungane lesitha esidala, iDynamos lapho okubikwa ukuba kwangena abantu abangu-10 000 enkundleni yeBarbourfields.
Umdlalo lo, ubungowokuthakazelela iminyaka engu-100 iHighlanders yasungulwa. Uphinde wavala lomkhosi weKuzana Sports and Creatives Economy Expo, oqale ngoLwesithathu olwedluleyo waphela ngeSonto koBulawayo.
Umkhosi lo ulethe inkokheli zikaHulumende labanye abaqakathekileyo kwezemidlalo elizweni.
Kumbiko yokuhlanganiswa kwemali etholwe kulumdlalo, ebonwe yi-Zimpapers Sports Hub, kubikwa inani labantu ababhadale ukubukela umdlalo lifike ku-9 838. Imali yonke etholakale emagedini ibe yi-US$58 804 le-R5 680.
I-Zimbabwe Revenue Authority (Zimra) ithole i-US$7 891,45 le-R762, iHighlanders yathola i-US$50 912,55 le-R4 917.
Ugatsha lwezemidlalo kuHulumende luthwale ezinye indleko zomdlalo njalo kwavunyelwana
ukuthi ezinye imali zingabhadalwa.
I-Highlanders ibe lesizatho sokuthaba ngoba ugatsha lwezemidlalo yilo oluthwale indleko
zokubhadala iDynamos imali yokuvuma ukudlala umdlalo lo.
IDynamos inqobe umdlalo nge 1-0. Iqembu leBosso, elasungulwa ngo-1926, lihlezi lingelinye
lamaqembu alabalandeli abanengi elizweni njalo yilo elidala kulawo wonke adlala kuligi yePremier
Soccer League.
Imisebenzi yokuthakazelela iminyaka le, izaqhubeka mhlaka 24 Mfumfu ngomkhosi wezemidlalo,
kuphinde kube lomjaho wokugijima.
Umcimbi omkhulu womculo uhlelwe mhlaka 31 Mfumfu, njengengxenye yokuvala imikhosi
yokuthakazelela iminyaka elikhulu yeHighlanders.
