Online Reporter
YiNtatheli kaMthunywa
KULENJIVA eleminyaka engu-34 yokuzalwa egwetshelwe ukuyapika iminyaka engu-20 ejele ngemva kokutholakala ilecala lokudlwengula isihlobo sayo esasileminyaka eyisificamunwe munye eGweru kuminyaka engu-15 edluleyo.
Umantshi womthethwandaba weGweru uMnumzana Christopher Maturure ugwebe umsolwa, igama lakhe siligodlile ukuze kuvikelwe umamangala, ngemva kokumthola elamacala amane okudlwengula.
Umsolwa loba ewaphikile amacala abebhekane lawo, utholakale elecala ngemva kokuthoniswa kwecala.
Umantshi uqume ukuthi kucala linye ngalinye apike iminyaka engu-10 ejele kodwa ubuye wathi izigwebo ezimbili zizabe zihamba ndawonye okuzakwenza ahlale ejele iminyaka engu-20.
Esethula isigwebo, umantshi uMnu Maturure uthe okwenza isigwebo sibe side yikuthi umamangala wayengumntwana owayedinga ukuvikelwa, futhi umsolwa wayemdala kakhulu kulomamangala njalo isenzo lesi saphambanisa ubudlelwano phakathi kwezihlobo.
Inkundla izwe ukuthi umsolwa wayeleminyaka engu-19 ngesikhathi esenza amacala la, kukanti umamangala wayeleminyaka eyisficamunwe munye njalo beyizihlobo.
Umsolwa kubikwa wahlukuluza umamangala emacansini kusukela ngenyanga kaNhlangula kusiya kuNcwabakazi ngomnyaka ka 2011 kwenye indlu eGweru.
Ngemva kokudala amacala la, umsolwa wabaleka waya elizweni leSouth Africa, okwabangela ukuthi icala leli lihlale iminyaka engu-15 lingathonisiswanga.
Umsolwa ubotshwe ngemva kokuphenduka eZimbabwe ngesikhathi kuhlaselwa abantu bakwamanye amazwe eSouth Africa.
Inkundla izwe ukuthi umsolwa wayehlukuluza umamangala emacansini ngesikhathi ugogo wakhe eseSouth Africa ukuyathengisa.
