Online Reporter
YiNtatheli kaMthunywa
ILOKHE itshaqe umzimba imuli yakoMoyo eGuwe, eNkayi eyabulawelwa indodana yayo kwabuye kwatshontshwa igazi layo kulandela ukungcwaba isidumbu esingayisiso ngephutha.
Ilunga lemuli le, uGift Moyo, lidlule emhlabeni ekuqaleni kwenyanga kaMpandula ngemva kokugwazwa ezitolo.
Kuvele ukuba ekuthatheni isidumbu sikaGift emotsha yesibhedlela seNkayi, amalunga emuli le athatha isidumbu esingayisiso ayasingcwaba.
Kuzwakale ukuthi abakoMoyo bangcwaba isizalwane seGwanda esafa ngemva kokudla itshefu eNkayi.
Kulandela ukwenzakala kwezehlakalo lezi, imuli yakoMoyo isilembuzo eyidida ingqondo ngezehlakalo lezi.
Intatheli ixhumane lelunga lemuli yakoMoyo ebelilungisa amaphepha okuthi kuphandwe isidumbu esabekwa emzini wakoMoyo.
“Siphakathi kosizi olukhulu njengemuli, sidinga ukuncediswa ukubisela isidumbu sabantu eNkayi sicela abenelisayo basifakele izandla sisebenze umsebenzi lo.
“Ekuthatheni kwethu isidumbu, safika satsho ukuthi umufi ngulo sasesisuka basala begezisa isidumbu silindile phandle. Ukuthi kwahamba njani ukuthi size sithathe isidumbu esingayisiso sethu asikuzwisisi.
“Kuyasidida ingqondo, silembuzo eminengi siyimuli ukuthi uGift wayelephepha elalibhalwe esandleni libhalwe ibizo lakhe, kwaphambaniseka njani ukuthi sicine sithwala umuntu ongasiwethu,” kubika ilunga lemuli leli.
Uqhubekele phambili eveza ukuba beyimuli lokhe bedidekile.
“Umuyi esefike ngekhaya ezabekwa, sanika abantu ithuba lokumvalelisa lathi siyimuli samvalelisa, akula loyedwa owambonayo ukuthi kayisuye uGift. Asazi ukuthi sembeswa yini, ngeke ngitsho lokuthi kwahamba njani ukuze sibe sesilingweni esingaka ngempela kukhona abalesandla esigeni lesi.
“Ubabakazi womntwana wavela wasola ngesikhathi esegwaziwe ukuthi kanti inhlabathi elegazi ibuthwe ngubani lamuhla nanko sesingcwabe umuntu ongayisuye, owethu lokhe esemotsha.
“Sesibuthana kabili ngapha lamaphepha awokuba aphandwe awakalungiswa lokhe sizama ukulungisa ukuthi lo esambekayo athole ukuphumula kwabakibo.”
Uthe basalinde imvumo yamapholisa ukuthi baphande isidumbu.
Isikhulumi samapholisa elizwenioveze ukuba kakatholi umbiko ogcweleyo ovela esabelweni seMatabeleland North.
Imizamo yokukhulumisana loProvincial Medical Director wesabelweni seMatabeleland North yehlule.
