Online Reporter
Fungai Muderere
IQEMBU elitshibilika kuPacific Breeze Southern Region Soccer League, iHwange libhekane lohambo olude olungamakhilomitha angu-800 okuya eShamva, lapho elizadibana khona le-FC Hunters emdlalweni wenkezo yeZifa Munhumutapa Challenge, enkundleni yeWadzanai ngoMgqibelo.
IHwange ingena kulumango ngemva kokwenza okunye okumangalisayo esigabeni esidluleyo, lapho eyethuse khona iziqhwaga zePremiership, iDynamos, nge 1-0 eColliery.
Kodwa, ngemva kokunqoba lokho, umvuzo wabo ngolunye uhambo olude, olungaphambanisa abadlali bengakafiki enkundleni.
Njengoba bengatholi usizo nxa bedlalela ekhaya, abadlali beHwange kumele baqine nxa befuna ukufinyelela kuma-quarter finals.
Iqembu leColliery lizangena kulumdlalo likhuthazwe yikudlala kwalo kuPacific Breeze Southern Region Soccer League, lapho elatshaya khona iMbizo 4-0 ngoMgqibelo odluleyo. IBlackrock layo ibhekane lohambo olude, njengoba izahamba amakhilomitha aphezulu kwe-500 isuka eHwange isiya eZvishavane lapho ezadlala khona leFC Platinum eMandava, ngoMgqibelo.
Leliqembu libe lecebo lokwehlisa umthwalo wohambo, njengoba lihle lahlala koBulawayo ngemva komdlalo walo weligi leCasmyn ngaphambi kokuqhubeka ngohambo lokuya eZvishavane.
Icebo leli lihlose ukunika abadlali isikhathi sokuphumula ukuze bangafiki sebekhathele ngenxa yokuhamba umango wonke ngasikhathi sinye.
IBlackrock izangena emdlalweni izethemba ngemva kokukhupha iHighlanders emncintiswaneni, inqoba nge-5-3 kumbekwa, eColliery.
Kodwa, khathesi balindelwe ngomunye umsebenzi onzima, wokudlala leFC Platinum.
Kumathimu amane kumhlubulo ongezansi yelizwe, iJordan yiyo ekhangeleka ilomthwalo omkhulu njengoba izamukela iHardrock enkundleni yeLuveve, ngeSonto.
IHardrock ifika koBulawayo iyingxenye yamaqembu asethuse abanengi kuPremiership kulisizini, ikhokhelwa ngumgadli ohamba phambili uWashington Navaya.
UNavaya usefake amabhola angu-15 entanjeni, ngemva kwemidlalo engu-27, okumenza abengumgadli ohamba phambili kuligi ephezulu. Umdlali lo, owaba yingcitshi kubadlali bonke ngo2025, ethatha lesicoco seGolden Boot, uzaba yingozi enkulu kuJordan, eyaphumelela ukukhupha iGwanda Pirates nge-3-1 kumbekwa.
IJordan kumele idlale ngokuzimisela ekuvikeleni nxa ifuna ukumisa uNavaya leHardrock.
IMunhumutapa Challenge Cup yokuqala isivele ibambe inhliziyo yabalandeli bebhola kuleli, njengoba amaqembu akumaligi aphansi etshengise ukuthi angenelisa ukuncintisana lamaqembu amakhulu.
Umncintiswano lo usekelwa ngemali engange-US$5 million ngomnyaka, njalo amaqembu aphuma esigabeni se-Round of 16 azathola i-US$30 000 ngalinye. Kumathimu akumaligi aphansi, lo ngumvuzo omkhulu.
Kulimpelaviki, amaqembu eSouthern Region azaphinda azame ukuphazamisa konke obekulindelwe, efuna ukuqhubekela phambili kulumncintiswano.
