Online Reporter
Nkosilathi Sibanda
IKHANSILI yeHwange Local Board isithole usizo olukhulu kumizamo yayo yokugcina idolobho lihlanzekile ngemva kokwamukela imota entsha yokuthwala ingcekeza, etholwe ngaphansi kohlelo lweLocal Authority Trading Standards Programme.
Imota le izancedisa kakhulu ekuthuthweni kwezibi endaweni ezihlala abantu, kumabhizimusi lalapho kulemisebenzi kazulu.
Isikhulumi seHwange Local Board, uMnumzana Dumisani Nsingo, uthe ukufika kwemota le kulinyathelo elikhulu ekukhuphuleni indlela ikhansili eqoqa ngayo ingcekeza lokuthuthukisa umsebenzi wokuhlanzeka kwendawo.
“Imota le izasivumela ukuthi siqoqe ingckeza enengi ngesikhathi esifitshane, ngalokho sinciphise ukubambezeleka kwezinye indawo.
“Lokhu kuzaqinisa imizamo yethu yokugcina indawo yethu ihlanzekile, iphephile njalo ivikelekile kwezemvelo,” kutsho uNsingo.
Uthe imota entsha le izaqinisa amacebo abawasebenzisayo ekuqondiseni indlela yokuphathwa kwengcekeza.
Phakathi kwenhlelo ezizaqhutshwa yikhansili kubalwa ukuqoqwa kwengcekeza ngezikhathi ezihleliweyo, ukufakwa kwamabhimu endaweni eziqakathekileyo, ukukhankasela ukuhlanzeka emphakathini lokujezisa abephula imithetho yemvelo.
“Sikhuthaza izakhamizi ukuthi zisebenzise indawo ezimiselwe ukulahla ingcekeza. Ukuhlanzeka akusimlandu wekhansili kuphela kodwa ngumsebenzi wethu sonke,” kutsho uNsingo.
