Online Reporter
YiNtatheli kaMthunywa
NGEMVA kokukhululwa kwakhe yiChicken Inn ngaphambi kokuqala kuka-2025, owayengukaputeni waleliqembu uDanny “Deco” Phiri ukholelwa ukuthi inyawo zakhe zisaqinile.
UPhiri (35), ubuyele kuma-Gamecocks ngomnyaka odluleyo ngemva kwesizini eyodwa ekuBulawayo Chiefs.
Ungene kuMakhosi Amahle kulandela ukusuka kwakhe kuGolden Arrows eyeSouth Africa lapho adlala khona kumidlalo engamatshumi ayisitshiya galolunye lesikhombisa.
“Kuliqiniso ukuthi angisekho kuChicken Inn njalo ngidinga iqembu lokudlalela. Ngikholwa ukuthi inyawo zami zisaqinile,” kutsho Phiri, ekhuluma leZimpapers Sports Hub.
Umqeqetshi weChicken Inn uJoey Antipas uthe:
“UPhiri ubeyingxenye yeqembu lethu njalo engumdlali owenze umsebenzi oncomekayo, wayibamba indima eqenjini lethu. Ungumdlali osezingeni eliphezulu, ngicabanga ukuthi ukulimala kumphambanisile ngendlela thize.”
KuGolden Arrows, uPhiri ubengomunye wabadlali abane bakuleli abagoqela loKudakwashe Mahachi, Devine Lunga loKnox Mutizwa.
UPhiri uke wadlalela leqembu lelizwe njalo wake waphakamisa isicoco se-Soccer Star of the Year ngo-2015, ngesizini iChicken Inn isiba yintshantshu yeligi.
Omunye umdlali okhitshwe eqenjini ngunozinti uPride Zendera.
Ekupheleni kwesizini nyakenye, uPhiri watshela intatheli yeZimpapers Sports Hub ukuthi kasoke athathe umhlalaphansi.
“Ngisakhona enkundleni. Ngisazodlala. Akusiqiniso lokho elikuzwayo ukuthi sengitshiye ukudlala. Nxa kunjalo, lizakuzwa kimi, kodwa okwamanje ngikhangelele ukuthi ngizinikele emdlalweni wami.
“Kangikakulungiseleli ukutshiya. Kunengi engifuna ukukwenza emdlalweni. Ngizadlala njalo ngesizini elandelayo. Ngizaqhubeka ngokusebenza nzima langokuzinikela,” nguPhiri lo ekhuluma ngoMpalakazi nyakenye.
