Ilanga selitshisa, akubhukutshwe!

The inter-club gala is expected to attract clubs from all provinces, with swimmers also taking the opportunity to assess themselves in the early stages of the season.

Nkosilathi Sibanda

ABATHANDA ukubhukutsha koBulawayo bazathola elinye ithuba lokubuyela emanzini ngoLwesihlanu kuliviki, njengoba ikhansili ibike ukuthi izavula zonke iziziba zayo, kulandela ukuvalwa kwazo ngesikhathi sobusika.

Ukuvulwa kwama swimming pool kulindeleke ukuthi kube yinzuzo enkulu emphakathini, ikakhulu kubantwana lentsha abathanda ukubhukutsha, njengoba kuzakwenza ukuthi bathole indawo eziphephileyo zokuzilolonga lokuthuthukisa amathalenta abo, kulabo abasemdlalweni. Ababhukutshi laba bazaphinda bathole ithuba lokulungiselela imincintiswano eyahlukeneyo, kuthi imuli zizathola lendawo yokuphumula lokuzithokozisa.

Idolobho lilezindawo zokubhukutsha ezigoqela iCity Pool kanye lamanye aseLuveve, eMpopoma, eBarbourfields, eBarham Green leNorth End.

Abaphatheka kumdlalo wokubhukutsha koBulawayo abakhulume lephephandaba likazulu bathe ukuvulwa kwama-pool kuzanceda ukuthi abantwana basebenzise isikhathi sabo ngendlela eyakhayo, ikakhulu ngesikhathi sekhefu lezikolo.

“Ukuvulwa kwama-pool kuyamukeleka ngalesi isikhathi ngoba abantwana abanengi bayakuthanda ukubhukutsha kodwa baswela indawo eziphephileyo abangazisebenzisa,” kutsho uDiana Ncube ongumqeqetshi wezokubhukutsha oseHillcrest.

“Nxa ama-pool evuliwe, abazali bayakhululeka ngoba abantwana bayabe besendaweni evikelekileyo. Banengi abantwana abalesiphiwo sokubhukutsha emalokitshini lakwezinye indawo, kodwa nxa bengelayo indawo yokuzilolonga kunzima ukuthi bathuthuke. Ukuvulwa kwama-pool kuzanika abantwana laba ithuba lokuqeqetsha lokuncintisana.”

Kumbiko okhitshwe ngoLwesibili, ikhansili ithe iziziba zayo zizavulwa kusukela ngehlola lesitshiya galolunye lengxenye kusiya ku-1 emini, ziphinde avulwe ngo-2 emini aze avalwe ngo-5.30 ntambama.

Ukuvulwa kwawo kukhangelelwe ukuthi kuvuselele ezemidlalo yokubhukutsha koBulawayo, kukhuthaze abantwana ukuthi basebenzise amathalenta abo njalo kunike umphakathi indawo ephephileyo yokuzilibazisa.