Online Reporter
Lovemore Dube
AMALUNGISELELO omncintiswano wezikolo ezikumhlubulo ongezansi ye-Africa oweConfederation of Schools Sports of Southern Africa (Cossasa), ozaphathwa koBulawayo kusukela ngoMvulo, kubikwa asezingeni eliphezulu.
Kukhangelelwe ukuthi kuncintise izikolo ezimele amazwe ambalwa kumidlalo yabagijimayo labadlala imidlalo etshiyeneyo. Imidlalo izaphela ngoLwesithathu.
Imidlalo le, iqoqwe yiNational Association of Primary School Heads (Naph) leNational Association of Secondary School Heads (Nash).
Abantwana abazamela iZimbabwe kubikwa bakhethwa kumincintiswano eyenziwa ezikolo ngethemu edluleyo.
Ekhuluma leZimpapers Sports Hub, omunye wezikhulumi zeNash, uKelvin Dube uthe amalungiselelo ahamba kuhle njalo bakhangelele ukuba lemidlalo ezakhwabithwa ngumuntu wonke.
“Siyagijima nje silungiselela imidlalo le silethemba ukuthi idolobho lakoBulawayo lizaphakama ngokuphatha imidlalo. Konke kuyahlangana, sizimisele,” nguDube lo.
Kubikwa amazwe athembisa ukuncintisa yiZambia, Malawi, Namibia, Lesotho, Eswatini leSouth Africa.
Inkokheli zemidlalo kuleli bezikhangelelwe ukuthi ngoLwesithathu kuhlolwe amalungiselelo, kuvakatshelwe inkundla ezizasetshenziswa, lapho okuzahlalwa khona.
Omele izikolo zezinga eliphansi kuNaph, uGiyani Moyo uthe balokuthokoza ukuthi baphiwa ithuba lokuthi idolobho lakoBulawayo litshengise uthando kuzethekeli njalo lokwenelisa ukuphatha imidlalo.
“Sikhangelele ukuthi kusukela ngoLwesihlanu kusiya ngeSonto, sibhalise umuntu wonke ozasebenza, abadlali labanxusiweyo. NgeSonto kuzavulwa imidlalo nguMphathintambo weState for Provincial Affairs and Devolution uJudith Ncube. Imidlalo le ipha abasakhulayo ithuba lokuzwana amandla labosowabo besigaba.”
Banengi abantwana abadlule kumidlalo le, bazakhela udumo, bakhulisa ithalenta labo, abagoqela lentshantshu yokugijima, uTebogo Letsile.
