Online Reporter
Nkosilathi Sibanda
UHULUMENDE useveze ukuzimisela kwakhe ekwakheni inkundla yezemidlalo entsha eMt Hampden njalo lokhu kuza ngesikhathi ilizwe lisamukela imitshina ye-Video Assistant Referee (VAR) kumdlalo wenguqu.
Isakhiwo sezemidlalo lesi kukhangelelwe ukuthi sibe ngesinye sezakhiwo ezinkulu zemidlalo elizweni, njalo ingxoxo zosekelo lwemali ziyaqhubeka ngokutsho kukaNobhala wezemidlalo kuHulumende uNicholas Moyo.
“Kuzakhiwa inkundla emangalisayo njalo indawo isikhona. UHulumende uphakathi kwengxoxo lalabo abafuna ukuxhasa ngemali.
“Njengelizwe, kasihlosanga ukulondoloza inkundla yeNational Sports kuphela, kodwa sikhangelele ukuba leyinye inkundla ezaphatha eminye imidlalo,” kutsho uMoyo.
Kusenjalo, ukukhonona lokungasuthiseki ngezinqumo ezenziwa ngonompembe kukhangelelwe ukuthi kwehle nanko sekwethulwe imitshina ye-Video Assistant Referee, iVAR.
Imitshina yakulezinsuku le, esisetshenziswa ukugcizelela izinqumo zabonompembe, iyaqala ukufika kuleli loba nje sekulesikhathi eside isetshenziswa kwamanye amazwe.
Ngeviki edluleyo, umongameli weZimbabwe Football Association uNqobile Magwizi utshele iZimpapers Sports Hub ukuthi imitshina ye-VAR izaguqula okunengi mayelana ngokuphathwa kwemidlalo.
Wabika lokuthi mhla imitshina le ifika, izasetshenziswa kuqala enkundleni yeNational Sports, kulandele eRufaro laseBarbourfields ngokuya kwesikhathi.
“Ngesikhathi lapho imitshina yakulezinsuku kuyiyo ekhokhela konke esikwenzayo, ukuba khona kwe-VAR yinto enhle kithi sonke,” kutsho uMagwizi.
Ngokunjalo, uMagwizi uthe inhlanganiso isesigabeni esiphezulu sokulungiselela ukuqaliswa kokusebenza kwe-VAR.
“Sikhangelele ukuqala uhlelo lwe-VAR. Lokhu akutsho ukuthi i-VAR izabe isikhona emdlalweni olandelayo, kodwa sizasebenzisana kakhulu le-Fifa labanye esisebenza labo kulumhlubulo we-
Africa ukuze siqeqetshe onompembe, sifake imitshina njalo siqalise ukusebenzisa i-VAR,” kutsho uMagwizi etshela iZimpapers Sports Hub.
Uhlelo lolu lusekelwa ngemali yinkampani yeSakunda Holdings, ethembise ukuxhasa ukufakwa kwe-VAR enkundleni yeNational Sports Stadium, eRufaro, laseBarbourfields.
INational Sports Stadium kubikwa yiyo okukhangelelwe ukuthi ibe ngeyokuqala ukuthi ibe lemitshina le. Umsebenzi wokufaka imitshina ukhangelelwe ukuthi uqhutshwe kungakapheli u2026.
Inkundla zeRufaro leBarbourfields zona zikhangelelwe ukuthi zibe lemitshina le kusiyafika uMbimbitho 2027.
Ukufika kwemitshina kuzavula indlela yesigaba esilandelayo, esizagoqela ukuqeqetshwa lokuhlolwa kwabonompempe bakuleli ukuze benelise ukusebenzisa i-VAR emidlalweni.
