Online Reporter
Fungai Muderere
UWASHINGTON Navaya useqoqoda emnyango wokuzakhela udumo kumdlalo kanobhutshuzwayo kuleli.
Umgadli weHardrock lo, usehlohle amabhola angu-15, ngakho sekusele amabili nje kuphela ukuthi edlule angu-17 awahlohla ngesizini edluleyo, amenza wathatha isicoco seGolden Boot lese-Soccer Star of the Year.
Njengoba uNavaya eqhubeka ngokuhlohla, umbuzo omkhulu ngothi: angakwenza yini futhi lonyaka?
Umdlali lo, ophinda adlalele amaWarriors ulesizini enhle kumkhankaso walonyaka njalo indlela adlala ngayo isiphethwe emlonyeni wabalandeli labathandi bomdlalo.
Kodwa, eqinisweni, amandla okuhlasela kuHardrock awapheleli kuNavaya kuphela.
Ukubambisana kwakhe lomunye umgadli wamaWarriors, uPrince Dube, sekuqala ukutshengisa ukuthi kungaba yingozi enkulu kumvimbi zamanye amaqembu. UDube usefake amabhola ayisithupha selokhe wangena kuHardrock phakathi komnyaka.
Ukusebenzisana kwalaba abadlali sekunike iHardrock amandla amakhulu ekuhlaseleni, uNavaya eletha amagoli kuthi uDube engeze owakhe umlilo.
Njengoba uDube laye eselijwayela iqembu leHardrock, amaqembu aphikisana labo sekumele akhathazeke ngomunye umgadli ngaphandle kukaNavaya.
Ukuzwana phakathi kwalaba badlali ababili bamaWarriors kungaba yinto eqakathekileyo kumkhankaso wokuhlohla njalo kungenza iHardrock ibe ngelinye lamaqembu ayingozi kakhulu ekuhlaseleni.
Ibhola ngalinye, elihlohlwa nguNavaya, limsondeza ekulinganiseni kusicoco seGolden Boot njalo okuseleyo yikuthi asebenzele ukwedlula ahlohlwa ngumuyi uNorman Maroto angu-22.
UMaroto wahlohla amabhola la ngesizini ka-2010. Akula mdlali kuPremiership osedlule inani leli.
Kungaba nguNavaya yini?
