Online Reporter
UMUNTU ungamthembi loba sekutheni!
Lokhu kuchaza sobala isenzo senye indoda yeFilabusi ephenduke ubunyamazana, yatshiya ihlazo emulini ngokudlwengula abazukulu bayo ababili.
Indoda le, eleminyaka engu-52 yokuzalwa edabuka esiqintini sePhumelela eFilabusi, ngaphansi kwenduna uMaduna igwetshelwe ukuyahlala ejele iminyaka engu-20 ngemva kokutholakala ilecala lokudlwengula lokuhlukuluza ngokocansi abazukulu bayo.
Umsolwa esingeke saqamba igama lakhe ngenhloso yokuvikela omamangala, umiswe emthethwandaba weGwanda lapho okuvele ukuba wadlwengula umzukulu oleminyaka engu-13 lomunye oleminyaka engu-12 yokuzalwa.
“Phakathi kwenyanga kaLwezi 2025 loNhlangula 2026, indoda le yahlukumeza umzukulu wayo oleminyaka engu-13 amahlandla amane endaweni ezitshiyeneyo, okugoqela esibayeni, emasimini lasemkulwini.
“Mhlaka 4 Nhlangula 2026, wahlukuluza omunye umzukulu wakhe oleminyaka engu-12 emacansini ngemva kokumngenisa ekamelweni imnika ukudla,” kutsho umbiko weNational Prosecuting Authority of Zimbabwe.
Kubikwa umsolwa wayehlala esongela abantwana laba esithi uzazibulala nxa bangatshela omunye umuntu ngodaba lolu.
Icala labikwa ngemva kokuba umntwana oleminyaka engu-12 ebaleke wayahlala kugogo wakhe, lapho afika walandisa ngokwamehlelayo.
Udaba lwabikwa emapholiseni, indoda le yabotshwa njalo abantwana laba bayahlolwa esibhedlela.
Umthethwandaba ugwebe indoda le iminyaka engu-20 ejele ngecala lokudlwengula, kanye leminye iminyaka engu-20 ngecala lokuhlukuluza ngokocansi. Izigwebo zombili zizahamba ndawonye, okutsho ukuthi uzahlala ejele okweminyaka engu-20.
