Sukulwenkosi Dube-Matutu
KULENDODA yeFilabusi eleminyaka engu-24 yokuzalwa eyethuse inkundla kulandela ukuzwa ukuthi yadlwengula unina ngoba ehamba emnyeya.
Indoda le, esingeke saqamba igama layo ngenhloso yokuvikela umamangala, imiswe phambi komthethwandaba weGwanda isetheswa icala lokudlwengula unina omdala oleminyaka engu-48 yokuzalwa.
Umantshi kulelicala, uNkosikazi Sithembiso Ndebele uthole umsolwa elecala waquma ukuthi ayepika iminyaka engu-15 ejele.
Umtshutshisi uMnumzana Ngonidzashe Shumba utshele inkundla ukuthi umsolwa wadlwengula umamangala mhlaka 20 Nhlolanja ngemva kokumthola eyedwa emzini wakhe.
Umamangala uhlala lomkakhe, onguyise omdala kamsolwa.
UMnu Shumba uthe mhlaka 20 Nhlolanja, ngehola lesibili emini, umsolwa wafika emzini kamamangala edinga uyise wathi kulodaba oluthile afuna baluhlafune.
“Umamangala watshela umsolwa ukuthi umkakhe kakho uvakatshile wasemcebisa ukuthi abuye angaphenduka.
“Umsolwa wala ukuhamba, wasesola umamangala esithi wayengamthandi njalo emvimba ukuthi abe lobudlelwano obuhle loyise. Wathi yilo udaba ayefuna ukulukhuluma laye.
“Umamangala wabiza umakhelwane wakhe owatshela umsolwa ukuthi ahambe,” kutsho uMnu Shumba.
Umtshutshisi uqhubekele phambili esithi ngalelo langa, ngehola letshumi ebusuku, umsolwa waphenduka esedakiwe.
Waqoqoda emnyango, watshela umamangala ukuthi ufuna ukubona uyise.
UMnu Shumba uthe umamangala wavula umnyango, wamchazela ukuthi umuntu ayemdinga wayengekho, wasemtshela ukuthi abuyele ngakibo.
Kodwa umsolwa wala ukuhamba, wafuqa umnyango ngamandla, wangena endlini yokulala kamamangala.
“Umsolwa waqala ukusola umamangala esithi wayemnyeya, okwakusenza ukuthi kube lokungezwani phakathi kwabo. Watshela umamangala ukuthi ufuna ukumjezisa.
“Umsolwa wathembisa ukuhlasela umamangala ngehloka angahlaba umkhosi. Wamgxavuna, wamwisela embhedeni andubana amdlwengule ngapha esithi angavele abikele loba ngubani ngokwakwenzakele
uzambulala ngemva kokwenza ihlazo leli wadliwa ngumnyama,” kulandisa uMnu Shumba.
Kubikwa umamangala wasuka emzini wakhe waya komakhelwane wafika wamlandisela ngokwakwenzakele.
Udaba lwabikwa emapholiseni, aqalisa uphenyo olwabangela ukuthi umsolwa abotshwe.
Ebuzwa ngumantshi ngesenzo sakhe umsolwa uphikile ukuthi wadlwengula umamangala loba ukuthi waya emzini wakhe ngalelolanga.
Uthe umamangala wayeqamba amanga ngaye ngoba babengazwanani.
Umsolwa uthe umamangala wayejayele ukumnyeya ngoba engafuni ukuthi laba bobabili babe lobudlelwano obuseduze.
