Ethel Ncube
KULENINA leGweru elitshise usane olulomnyaka owodwa ngamafutha andubana libuye limtshise emhlane ngokhuni ngenhloso yokuphindisela unina womntwana.
UNetsai Chitambira oleminyaka yokuzalwa engu-38, ohlala eRiverside, eGweru ugwetshwe ngumantshi weGweru uDeon Chiroyi ngoLwesibili ngemva kokutholakala elecala lokulimaza umntwana kakubi.
UMantshi uChiroyi ugwebe uChitambira ukuthi asebenze amahola angu-315 eGweru Military Museum kungelambhadalo.
Inkundla izwe ukuthi uChitambira watshisa umntwana lo, olomnyaka owodwa emathangazini ngamafutha mhlaka 2 Nkwenkwezi 2026, ngehola lesine emini. Ngemva kwensuku ezimbili waphinda wamtshisa futhi umhlane ngesikhuni.
Kuvele ukuthi uChitambira kunye lemuli yomntwana bangomakhelwane njalo umsolwa lonina womntwana babengazwanani.
Umtshutshisi kulelicala, uChristine Chidembo ubike ukuba umsolwa watshisa umntwana ngenhloso yokuphindisela unina womntwana.
Kubikwa mhlaka 2 Nkwenkwezi 2026, uChitambira wayepheka ngaphandle ngomlilo njalo abantwana babedlala duzane lomlilo.
UChitambisa wathela ngabomo umntwana ngamafutha atshisayo emlenzeni okwabangela ukuthi atshe. Ngemva kwensuku ezimbili wabuye njalo watshisa umntwana ngesikhuni emhlane.
Unina womntwana wananzelela ukuthi umntanakhe wayetshile wahamba wayabikela amapholisa, umntwana wahanjiswa esibhedlela.
Incwadi kadokotela ivezwe emthethwandaba njengobufakazi.
Umantshi ngemva kokuzwa izehlakalo kunye lokuzwa ubufakazi uqume ukuthi uChitambira ayesebenza amahola angu-315 kungelambadalo.
