Online Reporter
YiNtatheli kaMthunywa
KUSEHLAKALO esitshiye izakhamizi zeChimanimani zitshe amathe, kulenina okubikwa ladakwa ledlulisa amalawulo, latshisa umkulu wangakibo okwabangela ukuthi unina oleminyaka engu-72 yokuzalwa edlule emhlabeni.
UGogo uNorah Mukonya wedlule emhlabeni ngemva kokutsha kulandela ukuba indodakazi yakhe uSekai Mukonya, etshise indlu yangakibo.
UGogo uMukonya ubephila lobugoga kulandela ukoma uhlangothi ngesizatho leso wehluleka ukubaleka ngokunjalo watsha kakubi.
Umkakhe uJohn Mukonya (79), wenelisa ukubaleka waphuma engatshanga.
Omele isikhulumi samapholisa eManicaland uAssistant Inspector Wiseman Chinyoka, ugcizelele ngendaba le esithi uSekai wamane watshisa indlu le kungelasizatho.
Kusenjalo izakhamizi zendaweni le ziveze ukuthi inina leli lalike laxabana labazali balo lisithi babangela ukuthi abe lomnyama.
“Isehlakalo lesi senzakale mhlaka 3 kuyonale inyanga ebusuku lapho uSekai (44) afika ngakibo evela ebhawa edakiwe wafica unina loyise behlezi emkulwini.
“Wathatha izikhuni eziko watshisa indlu ababehlezi kiyo kungelasizatho. Uyise wenelisa ukubaleka kodwa unina ophila lobugoga wehluleka ukubaleka watsha waze wafa.
“Umnewabo wazama ukufonela indodana yakhe uBoniface (44) ukuze azoncedisa kodwa indlu yayivele isitshile. Indaba le yabikwa emapholiseni.
“Amapholisa afika athatha isidumbu sasiwa emotsha yeMutambara Mission Hospital njalo ukuchwayisisa kusaqhubekela phambili,” kutsho uAsst Insp Chinyoka.
