Online Reporter
Ethel Ncube
KULENKAMPANI yelizweni le-Indonesia elungisa amakha kunye lamasepa edinga izizalwane zeZimbabwe ezifisa ukusebenzisana layo njengebathengisi bempahla le.
Inkampani ye-Orson Indonesia ebibukisa imisebenzi yayo kumbukiso wezokuthengiselana osanda kwedlula oweZimbabwe International Trade Fair ithe ilamasepa, amafutha okugcoba lokunye okutshiyeneyo edinga abantu ukuthi bakuthengise.
Intatheli ikhulumisane loReiner Rogate Sinaga onguMphathi obona ngezokunakekelwa komzimba (Body Care Division Head) obike ukuba bafisa ukusebenzisana leZimbabwe.
“Inkampani yethu ilungisa amasepa lamafutha okugcoba e-Indonesia. Sibuye ukuzobukisa esikwenzayo kithi njalo sinanzelele ukuba abantu balapha bebethakazelela esibuye lakho.
“Banengi abasibuza ukuthi sitholakala ngaphi kodwa-ke asikabi lendawo lapho esithengisela khona eZimbabwe. Sidinga abantu abafisa ukuwoda kithi bathengise lapha eZimbabwe amasepa, amafutha okugcoba abadala labantwana. Sifuna abantu abalamachence okungenisa impahla zivela kwamanye amazwe (lmport licence) ukuthi sisebenzisane labo,” kubika uMnu Sinaga.
Uqhubekele phambili eveza ukuba abafisa ukuzitholela imali yokuziphilisa bangaxhumana labo.
“Sicela abafisa ukusebenzisana lathi basithinte ukuze siqale ukusebenzisana ku: [email protected],” kutsho uMnu Sinaga.
