Online Reporter
Innocent Kurira
AMALUNGISELELO ePanthers Academy International Taekwondo Tournament aqhubekela phambili njalo abaqoqi bawo babika ukuba bafuna umcimbi lo ube ngaphezu komncintiswano ngokuhlanganisa ezemidlalo, amasiko lomphakathi.
Umncintiswano lo, uzaqhutshwa mhlaka 26 lo 27 Mpandula eLarge City Hall koBulawayo njalo ukhangelelwe ukuhlanganisa abadlali abavela emazweni angu-11 ase-Africa.
IZimbabwe izancintisa leBotswana, Mozambique, Tanzania, Lesotho, Eswatini, Kenya, Nigeria, Namibia, Malawi le Angola emncintiswaneni lo ozabe uthakazelela iminyaka engu-19 kwasungulwa iPanthers Academy.
Kuza kuba lemidlalo yesibhakela lokuzivocavoca umzimba, i-aerobics, ngaphambi kokuthi kuqale imidlalo ye-Taekwondo.
Umqondisi wePanthers Academy uVusumuzi Ncube uthe bafuna umcimbi lo ube ngowemuli, lapho abantu abazathola khona ithuba lokuzilibazisa, ukuhlangana lokugubha ezemidlalo.
“Asihleli nje umncintiswano we-Taekwondo. Sakha umkhosi wezemidlalo edolobheni. Sifuna abantu beze bazithokozise ngemisebenzi etshiyeneyo, bahlangane njalo bakholise ezemidlalo ndawonye.”
Umbono wethu yikuthi iLarge City Hall ibe likhaya laphakade lomcimbi lo minyaka yonke,” kutsho uNcube.
Ukufakwa kwengqindi le-aerobics kuyingxenye yombono wePanthers wokwenza umcimbi lo ube yindawo yokugubha ezemidlalo, amasiko lomphakathi, hatshi ukuncintisana kwe-Taekwondo kuphela.
Abaqoqi bemincintiswano bakholwa ukuthi eminye imisebenzi le izakwenza ababukeli babe lezizatho ezinengi zokufika emcimbini, njalo inike abadlali abavela kwezinye indawo ithuba lokuhlangana lokwabelana ulwazi.
Njengoba abadlali, abaqeqetshi, iziphathamandla labalandeli bekhangelelwe ukuvela emazweni ehlukeneyo ase-Africa, umncintiswano lo ungancedisa ekukhuliseni ezemidlalo ezihambelana lokuvakatshela koBulawayo.
Izethekeli ezizabuya emncintiswaneni lo zizathola njalo ithuba lokubona amasiko lenzuzo ezitholakala kulelidolobho.
UNcube uthe iPanthers Academy ifuna umncintiswano lo ukhule ube ngumkhosi weminyaka yonke.
“Ukuncintisana kuqakathekile, kodwa sifuna njalo ukuthi abadlali abasakhulayo bakhe ubungane, bafunde ukuncintisana kuhle njalo bathole ulwazi oluqakathekileyo lokuncintisana emazweni omhlaba.
“Nxa abantu abamasiko ehlukeneyo behlangana ngezemidlalo, wonke umuntu usuka elakutholileyo,” kutsho uNcube.
KuPanthers Academy, umbono omkhulu yikuguqula umncintiswano lo ube ngumkhosi wezemidlalo weminyaka yonke ohlanganisa ukuncintisana, amasiko lomphakathi wakoBulawayo.
