Online Reporter
YiNtatheli kaMthunywa
KULENDODA yeKaroi ekhala zingomi kulandela ukulahlekelwa yisitho sayo sangasese, okwaqala kungathi kubangelwe yikuya emacansini lowesifazana owendileyo.
Kodwa ekudingeni usizo kwabezempilakahle njengoba isimo sakhe sasiqhubeka sisiba sibi, wabikelwa ukuba ulemvukuzane.
URemigio Tom, 47, uthe umkakhe wamfulathela ebona isimo sakhe sisiba sibi.
Uthe abantwabakhe labo balandela unina, bamtshiya yedwa engelaye ongamsiza njalo ephakathi kobuhlungu.
Ukhulume lentatheli ngoLwesibili eveza ukuba udinga usizo ngoba impilo yakhe ibuhlungu.
Uthe ubona angathi ngokuchaza ngesimo sakhe angathola uncedo aludingayo kakhulu.
URemigio ubuye watshengisa intatheli isitho sakhe somzimba esihlaselweyo.
“Impilo yami isimunyu.
“Nxa kuyikuthi ngahlangana lowesifazane otshadileyo okuyikho okungabe sokungidalele uhlupho lolu, sengathi umkakhe angangixolela.
“Ngiphakathi kwamalahle avuthayo emini lebusuku.”
URemigio uveze ukuthi ekuqaleni wayethembe imithi yesintu, ngaphambi kokuvakatshela odokotela.
“Ngesikhathi ngithintana labodokotela bangitshela ukuthi yimvukuzane yikho ngilahlekelwe yisitho sami,” utsho kanje.
URemigio, olabantwana abane, uthe useleminyaka emine ephakathi kobuhlungu, echaza isimo sakhe njengesiba sibi ngamandla.
“Angilayo imali yokwelatshwa,” kutsho yena.
Uthe manje usehlala lomnawakhe.
“Ngihlala ngimtshela ngobunzima engiphakathi kwabo,” utsho kanje.
