admin
ENYE indoda yepulazini le-Elstone Estate elaziwa njalo ngokuthi Konzi Farm, bucwadlana ledolobho leNorton, isithuthe emzini wayo yayahlala egangeni ibalekela inyoka ethi iyayikhotha kanye lesipoko ethi sasiyisithandwa sayo esabhubhayo.
UKhulu uKefas Fombe Dzenga (82) odabuka eBarwe, esigabeni se Villa Katandika eMozambique, uthi weza kuleli kudala, ilizwe lisabizwa ngelokuthi Rhodesia ngomnyaka ka1957.
Uthi inyoka le emkhothayo yasuka emithini ayiphiwa ngenye inyanga eyathi uzenelisa ukuwina ekubhejeni kwakhe amabhiza kanye lokuthi athandwe likhiwa elimqhatshileyo liphinde limnike imali enengi.
“Ngiyazi ukuthi ngadinga umuthi ngisenzela ukuthi ngehlule abanye kumdlalo wokubheja manje imithi le isiphenduke yaba yinyoka ehlala ingikhotha.
“Okunye njalo kulomunye umama engangithandana laye ongasekho emhlabeni owagxotshwa yimota sivela etshwaleni osewangivukela isipoko esifika emzini wami ngilele singibambe ngamandla ukuthi ngenze ucansi laso.
“Mina sengikhathele, ngesipoko lesi siyangitshaya ngingala ukuhlangana laso emacansini.
Sengihluphekile emzini wami okokuthi sengabaleka ngenxa yakho konke okwenzakala lapha.
“Isipoko sithi yimi engasibulalisayo. Sithi sesaqeda izihlobo zami sibulala eMozambique njalo sizaqedisa ngami,” utsho njalo.
UKhulu lo uthi kakaze athathe yiloba nje wake wazwana labomama abanengi.
“Inyanga yangipha uhali olwalubophe isigodo. Uhali lolu lwaqala ukubalude kusiya ngesikhathi lwacina lusiba yinyoka.
“Ngangihlala ngiwina nxa sibheja amabhiza ngisidla imali lamatshamali ami.
UKhulu uFombe uthe sewahamba ebantwini lamaphurofethi batshisa umuthi lo, kodwa akuncedanga.
Inyanga eyamnika umuthi lo ithi ayisafuni ukumbona ithi kazibonele ukuthi angayenzani.
Uthi udubo lolu lokulwiswa yisipoko kanye lokukhothwa yinyoka solumhluphe okweminyaka eminengi.
UMnumzana Wonder Sigareta (33) ongumakhelwane kaKhulu lo uthi kuliqiniso ukuthi uhlutshwa yisipoko kanye lenyoka.
“UKhulu lo usehluphekile bakithi ngokukhothwa yinyoka ayibonayo yedwa athi yayiluhali kudala’” utsho njalo.
“Kubikwa uKhulu uFombwe wabhadala imali engange $6-00 ukuze aphiwe umuthi owaphenduka waba yinyoka, khathesi usebaleka emzini wakhe esiyalala egangeni kumbe emasimini,” nguSigareta lo.
Online Reporter